Memleket basshysy Cameco korporatsııasynyń atqarýshy dırektory Tım Gıttseldi qabyldady
ASTANA. KAZINFORM — Prezıdent Qasym-Jomart Toqaev Sheteldik ınvestorlar keńesiniń 38-shi plenarlyq otyrysy aıasynda Cameco Corporation atqarýshy dırektory Tım Gıttselmen kezdesý ótkizdi, dep habarlaıdy Aqordanyń baspasóz qyzmeti.
Memleket basshysy Cameco kompanııasynyń «Qazatomónerkásip» UAK» aktsıonerlik qoǵamymen ýran salasyndaǵy 30 jyldyq strategııalyq seriktestiginiń nátıjesine joǵary baǵa berdi.
Qasym-Jomart Toqaev Qazaqstannyń ónerkásipti jańǵyrtý jáne qosylǵan quny joǵary óndiristi damytý baǵytyn dáıekti túrde iske asyryp kele jatqanyna toqtaldy.
Prezıdenttiń aıtýynsha, el ishinde tolyq ıadrolyq otyn tsıklin qalyptastyrý basym baǵyttardyń biri sanalady.
Kezdesýde atom salasyndaǵy yqpaldastyqty odan ári ilgeriletý, birlesken jobalardy júzege asyrý perspektıvasy talqylandy.
Buǵan deıin Prezıdent EQDB prezıdenti Odıl Reno-Bassony qabyldaǵanyn jazǵanbyz.
