AQSh-qa tikeleı áýe qatynasy: Qazaqstanǵa jańa Boeing ushaqtary jetkizilmek
VAShINGTON. KAZINFORM — Memleket basshysy Boeing kompanııasynyń atqarýshy vıtse-prezıdenti Djeff Shokkıdi qabyldady, dep habarlaıdy Aqordanyń baspasóz qyzmeti.
AQSh-qa jumys sapary aıasynda Prezıdent Qasym-Jomart Toqaev avıatsııa, qorǵanys jáne ǵarysh tehnıkalaryn shyǵaratyn Boeing transulttyq korporatsııasynyń basshylyǵymen kezdesti.
Prezıdent otandyq Air Astana, SSAT jáne Vietjet Qazaqstan kompanııalary elimizdegi avıatsııa salasyn damytýda erekshe mańyzǵa ıe ortaq jobalardy odan ári ilgeriletýge múddeli ekenin atap ótti.
— Bul rette Qasym-Jomart Toqaev Air Astana men Boeing arasynda ushaq jetkizý boıynsha kelisimge qol qoıylǵanyn quptady. Bıyl jyl sońyna deıin Qurama Shtattarǵa tikeleı áýe qatynasyn ashý maqsatynda Boeing 787 Dreamliner ushaqtary elimizge jetkiziledi dep josparlanyp otyr. Budan bólek, SCAT áýe kompanııasy qosymsha Boeing ushaqtaryn satyp almaq. Sondaı-aq amerıkalyq korporatsııamen seriktestik negizinde Shymkent áýejaıynda alǵashqy tehnıkalyq qyzmet kórsetý jáne jóndeý ortalyǵyn ashý múmkindigi qarastyrylyp jatyr, — delingen habarlamada.
Djeff Shokkı kompanııanyń tsıfrlandyrý salasyndaǵy josparymen bólisip, Qazaqstannyń kólik-tranzıt áleýetine joǵary baǵa berdi. Onyń aıtýynsha, áýemen júk tasymaldaý baǵytynda nátıjeli yqpaldastyq ornatýǵa múmkindik mol.
Sonymen qatar kezdesý barysynda avıatsııa salasyna maman daıarlaý jáne elimizdegi júk tasymaldaýshy ushaqtar parkin damytý perspektıvasy talqylandy.
Budan buryn Prezıdent U.S. International Development Finance korporatsııasynyń (DFC) atqarýshy dırektory Ben Blekti qabyldaǵanyn jazdyq.