Memleket basshysy Boao Azııa forýmynyń tóraǵasy Pan Gı Mýnmen kezdesti

HAINANЬ. KAZINFORM – Memleket basshysy BUU-nyń 8-shi Bas hatshysy, Boao Azııa forýmynyń tóraǵasy, Jahandyq jasyl damý ınstıtýty (GGGI) Assambleıasynyń Prezıdenti Pan Gı Mýnmen kezdesý ótkizdi.

Qazaqstan Prezıdenti Boao forýmyna qatysýǵa shaqyrǵany úshin Pan Gı Mýnǵa rızashylyǵyn bildirip, onyń BUU Bas hatshysy qyzmetin atqarǵan kezde álemdik qaýymdastyqqa eleýli eńbek sińirgenin atap ótti.

– Meniń pikirimshe, Siz Birikken Ulttar Uıymy tarıhyndaǵy eń úzdik bas hatshylardyń biri retinde qyzmet ettińiz. Eki jarym jyl Sizdiń jetekshiligińizben jumys isteý men úshin keremet kezeń ári zor mártebe boldy, – dedi Prezıdent.

Pan Gı Mýn Qasym-Jomart Toqaevtyń halyqaralyq yntymaqtastyqty damytýǵa eleýli úles qosqanyn aıtty.

– Siz Qazaqstan Prezıdenti retinde óńirdegi beıbitshilik pen kelisimdi saqtaýǵa, adamzat pen BUU-nyń múmkindikterin keńeıtýge belsendi atsalysyp kelesiz. Meniń oıymsha, Qazaqstan Shyǵys pen Batys arasyndaǵy asa mańyzdy kópir rólin atqaryp otyr. Siz Shyǵys pen Batystyń ahýalyn jaqsy túsinesiz. Bul rette tájirıbeńiz mol, – dedi Koreıa dıplomaty.

Kezdesýde halyqaralyq kún tártibindegi ózekti máseleler, onyń ishinde BUU-nyń jahandyq syn-qaterlerdi tıimdi eńserýdegi róli talqylandy.

Memleket basshysy Qazaqstannyń halyqaralyq bastamalaryna da toqtaldy. Bas Assambleıanyń 79-shy sessııasy aıasynda Qazaqstan Frantsııamen birlesip, One Water sammıtin ótkizýdi josparlap otyr. Sonymen qatar Astanada 2026 jyly Óńirlik klımattyq sammıt uıymdastyrylady.

Qasym-Jomart Toqaev Pan Gı Mýndy aldaǵy Astana halyqaralyq forýmyna bas spıkerlerdiń biri retinde qatysýǵa shaqyrdy.