Memleket basshysy «Bilim-Innovatsııa» lıtseı-ınternatynda boldy
TÚRKІSTAN. KAZINFORM – Qasym-Jomart Toqaevqa oqý ornyndaǵy bilim berý protsesiniń ereksheligi men oqýshylardyń ǵylymı-zertteý jobalary tanystyryldy.
Lıtseıde jaratylystaný-matematıka baǵytyna basymdyq beriledi. Atap aıtqanda, fızıka, hımııa, bıologııa, matematıka jáne ınformatıka pánderi boıynsha sabaqtar aǵylshyn tilinde ótedi. Ustazdar oqýshylardyń akademııalyq jetistikterine den qoıady. Nátıjesinde olar respýblıkalyq, halyqaralyq pán olımpıadalarynda jáne sport saıystarynda úzdik atanyp júr.
Jyl basynda jańa ǵımarat paıdalanýǵa berilip, lıtseı-ınternat Kentaýdan Túrkistan qalasyna kóshirilgen. Qazir munda 500-den astam oqýshy bilim alyp jatyr.
Prezıdent oqý jáne úıirme kabınetterin, sport zalyn aralap kórip, oqýshylarmen áńgimelesti.
Memleket basshysy elimizdiń keleshegi jas urpaqtyń qolynda ekenin aıtyp, olardyń oqýda ozat bolýyna tilektestik bildirdi.
Búginde Túrkistan oblysynda «Jaıly mektep» ulttyq jobasy boıynsha 14 myń oqýshyǵa arnalǵan 29 mektep salynyp jatyr. Sonymen qatar sybaılas jemqorlyq boıynsha isti bolǵan tulǵalardan tárkilengen qarjyǵa óńirde 20 bilim berý nysany boı kóteredi. Onyń 13-i bıyl paıdalanýǵa berilmek. Jyl sońyna deıin oblystaǵy 4 apatty jáne úsh aýysymdy 5 mekteptiń máselesi tolyǵymen sheshiledi.
