Bári ornyna keledi - Prezıdent BQO turǵyndarymen kezdesti
ORAL. KAZINFORM – Prezıdent sý basqan aýmaqtardy tikushaqpen aralap shyqqannan keıin Qaratóbe aýdany ortalyǵyndaǵy Qajym Jumalıev atyndaǵy mektep-gımnazııa bazasynda ornalasqan evakýatsııalyq pýnktke bardy, dep habarlaıdy Aqordanyń baspasóz qyzmeti.
Memleket basshysy gýmanıtarlyq kómekti taratatyn pýnkttiń jumysymen tanysyp, sý tasqynyna baılanysty jaqyn mańdaǵy aýyldardan kóshirilgen turǵyndarmen kezdesti.
Qasym-Jomart Toqaev turǵyndarmen áńgimelesý barysynda mundaı kólemdegi tasqynnyń buryn-sońdy bolmaǵanyna nazar aýdardy. Aıtýynsha, osyǵan uqsas jaǵdaı 1994 jyly bolǵan. Biraq bıylǵy tasqyn odan da asyp tústi. Prezıdent shyǵyndardy óteý úshin memleket barlyq qajetti sharany qabyldaıtynyn aıtty.
– Hal-jaǵdaılaryńyzdy bilý úshin arnaıy kelip otyrmyn. Bul – buryn-sońdy bolmaǵan úlken tabıǵı apat. Sondyqtan bárimiz bir el, bir halyq bolyp áreket etýimiz kerek. Memleket, Úkimet barshańyzǵa qol ushyn beredi. Materıaldyq, qarjylyq kómek kórsetedi. Oǵan esh alańdamańyzdar. Bári durys bolady, – dedi Prezıdent.
Kezdesýde jergilikti turǵyndar Jaqsybaı jáne Qaldyǵaıty ózenderine kópir salyp berýdi, sondaı-aq aýyl mańyndaǵy bógetterdi jańǵyrtýdy surady. Memleket basshysy atalǵan másele boıynsha Úkimetke tıisti tapsyrma beretinin jetkizdi. Sonymen qatar qarǵyn sýdy halyqtyń ıgiligine paıdalaný qajet ekenin atap ótti.
