Memleket basshysy bıologııalyq materıal týraly zańǵa qol qoıdy

ASTANA. KAZINFORM - Memleket basshysy «Bıologııalyq materıal almasý týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy, dep habarlaıdy Aqorda.

 Zańnyń mátini baspasózde jarııalanady.

Eske salsaq, buǵan deıin Senattyń jalpy otyrysynda «Bıologııalyq materıal almasý týraly kelisimdi ratıfıkatsııalaý týraly» Zańy maquldandy. Bul kelisimge 2022 jylǵy 20 mamyrda Mınsk qalasynda qol qoıylǵan.

«Osy zań - bıologııalyq zertteýler salasyndaǵy halyqaralyq yntymaqtastyqty nyǵaıtý jolyndaǵy mańyzdy qadam. Sondaı-aq, TMD-ǵa múshe memleketterdiń janýarlardyń juqpaly aýrýlarynyń taralýyn boldyrmaý, asa qaýipti aýrýlardyń zerthanalyq dıagnostıkasyn jetildirý, mıkroorganızmderdiń ulttyq kollektsııalaryn tolyqtyrý jáne osy kelisimge qol qoıǵan memleketterdiń aýmaqtaryn epızootııadan qorǵaý jónindegi kúsh-jigerin biriktirýge múmkindik beredi. Kelisimdi ratıfıkatsııalaý bıologııalyq materıaldarmen almasýdy halyqaralyq standarttar men talaptarǵa sáıkes retteı otyryp, ǵylymı mekemelerdiń sheteldik áriptestermen ózara is-qımyly úshin quqyqtyq bazany qamtamasyz etedi», - dedi senator Sáken Arýbaev.