Memleket basshysy Bıbigúl Tólegenovany 95 jasymen quttyqtady
ASTANA. KAZINFORM – 16 jeltoqsanda aty ańyzǵa aınalǵan opera ánshisi, aktrısa, pedagog Bıbigúl Tólegenova týǵan kúnin atap ótti. Bıyl Halyq ártisi, «Otan» ordeniniń ıegeri 95 jasqa toldy.
Mádenıet jáne aqparat mınıstrliginiń baspasóz qyzmetiniń málimetinshe, Bıbigúl Ahmetqyzyn osyndaı aıtýly kúnmen quttyqtaýǵa Almaty ákimi Erbolat Dosaev keldi. Ol Prezıdent Qasym-Jomart Toqaevtyń quttyqtaý hatyn oqydy.
Prezıdent quttyqtaý hatynda ulttyq mádenıettiń damýyna zor úles qosqan kórnekti óner qaıratkeriniń eńbegin atap ótip, onyń óneri jas urpaqqa shabyt berip, el maqtanyshyna aınalǵanyn jetkizdi.
- Uzaq jylǵy jemisti shyǵarmashylyq jolyńyz Sizdi abyroı bıigine kóterdi. Elimizdiń altyn qoryna mol mura qaldyrdyńyz. Ónegeli de ónerli shákirtter tárbıelep shyǵardyńyz. Eren eńbegińizdiń joǵary memlekettik nagradalarmen, mártebeli ataqtarmen jáne aıryqsha syılyqtarmen atalyp ótýi – zor mereı, - delingen Memleket basshysynyń quttyqtaýynda.
Óz kezeginde Bıbigúl Ahmetqyzy jyly lebizder úshin alǵysyn bildirip, barsha qazaqstandyqtardy Táýelsizdik kúnimen quttyqtady.
21 jeltoqsan kúni saǵat 15:00-de Respýblıka Saraıynda Bıbigúl Tólegenovanyń 95 jasqa tolýyna arnalǵan saltanatty kontsert ótedi. Baǵdarlamada Bıbigúl Ahmetqyzynyń shyǵarmashylyǵy shabyt bergen, ózderi de jetekshi juldyzǵa aınalǵan kórnekti ártisterdiń oryndaýyndaǵy klassıkalyq jáne qazaq mýzykasynyń uly týyndylary oryndalady.
Aıta keteıik, aty ańyzǵa aınalǵan ánshiniń mereıtoıy aıasynda Qazaqstan boıynsha 150-ge jýyq is-shara ótti. Kontsertter, kórmeler, mýzykalyq keshter, dóńgelek ústelder men konferentsııalar uıymdastyryldy.
Búgin qazaqtyń «qarlyǵash kómeı» ánshisi Bıbigúl Tólegenova 95-jasqa tolyp otyr. Mereıtoı aldynda ánshiniń ózimen suhbat qurýdyń sáti túsken bolatyn.