Memleket basshysy Beıbitshilik keńesiniń Aǵa keńesshisi Are Laıtstoýndy qabyldady
ASTANA. KAZINFORM – Prezıdent Qasym-Jomart Toqaev Qazaqstannyń Beıbitshilik keńesine qatysýynyń mańyzyn atap ótip, uıym aıasynda nátıjeli yntymaqtastyq ornatýǵa beıil ekenin jetkizdi. Bul týraly Aqordanyń baspasóz qyzmeti habarlady.
– Biz Beıbitshilik keńesiniń negizin qalaýshylardyń biri retinde atalǵan ınstıtýttyń jahandyq qaýipsizdik pen dıalogty nyǵaıtýǵa tıimdi yqpal etetinine senimdimiz, – dedi Memleket basshysy.
Kezdesýde Gaza sektoryndaǵy ahýaldy turaqtandyrýǵa úles qosýdy kózdeıtin Qazaqstan bastamalary talqylandy. Bul áleýmettik ınfraqurylymdy qalpyna keltirý, bilim berý jáne densaýlyq saqtaý jobalaryn júzege asyrý, azyq-túlik qaýipsizdigin qoldaý baǵyttaryn qamtıdy.
Are Laıtstoýn Qazaqstan Prezıdenti men halqyn Memlekettik rámizder kúnimen quttyqtap, elimizge beıbitshilik jáne baq-bereke tiledi. Sondaı-aq ol Memleket basshysyna AQSh Prezıdenti Donald Tramptyń ystyq yqylasy men lebizin jetkizdi.
Beıbitshilik keńesiniń ókili Qazaqstannyń osy jáne basqa da halyqaralyq uıymdar jumysyna belsene qatysatynyn, sonyń ishinde Ibrahım kelisimderine qosylý jóninde sheshim qabyldaǵanyn joǵary baǵalady.
Qasym-Jomart Toqaev pen Are Laıtstoýn kólik-logıstıka salasyndaǵy yntymaqtastyq, TRIPP jáne Orta dáliz aıasyndaǵy yqpaldastyq perspektıvasyn talqylady. Qazaqstannyń óńiraralyq ózara baılanysty nyǵaıtýǵa jáne halyqaralyq kólik baǵdaryn ártaraptandyrýǵa qyzyǵýshylyq tanytatyny atap ótildi.
Kezdesý sońynda Prezıdent pen Uıym ókili ekijaqty jáne kópjaqty kún tártibindegi aýqymdy máseleler boıynsha yntymaqtastyqty odan ári tereńdetýge daıyn ekenin rastady.
Aıta ketelik Tramp Toqaev pen Qazaqstandy Beıbitshilik keńesine shaqyrǵan edi. Gaza boıynsha Beıbitshilik keńesine on toǵyz el qol qoıdy.
