Memleket basshysy Belarýs prezıdentin Táýelsizdik kúnimen quttyqtady
ASTANA. KAZINFORM — Memleket basshysy Belarýs Prezıdentine quttyqtaý jedelhatyn joldady, dep habarlaıdy Aqordanyń baspasóz qyzmeti.
Qasym-Jomart Toqaev Aleksandr Lýkashenkony Belarýs Respýblıkasynyń Táýelsizdik kúnimen quttyqtady.
— Belarýs halqynyń birligin, ulttyq rýhynyń myqtylyǵyn jáne eldiń jasampazdyq pen órkenıet jolyndaǵy batyl qadamyn aıshyqtaıtyn bul aıtýly kúnniń sımvoldyq máni erekshe. Qazaqstandyqtar baýyrlas belarýs halqyna aıryqsha yqylas tanytyp, onyń tól mádenıeti men baı dástúrine zor qurmetpen qaraıdy, — dep jazylǵan jedelhatta.
Memleket basshysy Qazaqstan men Belarýs arasynda dostyq pen strategııalyq seriktestik rýhyna saı jemisti ári ózara tıimdi yntymaqtastyq jolǵa qoıylǵanyn atap ótti.
Qasym-Jomart Toqaev Aleksandr Lýkashenkonyń jaýapty memlekettik qyzmetine tabys, al Belarýs halqyna baq-bereke tiledi.
Osyǵan deıin Memleket basshysy Kanada Premer-mınıstrin ulttyq merekemen quttyqtaǵanyn jazǵanbyz.
