Óńirlik jalpy ónim 5 trıllıon teńgege jetti: BQO ákimi Prezıdentke esep berdi
ASTANA. KAZINFORM - Memleket basshysy Batys Qazaqstan oblysynyń ákimi Narıman Tóreǵalıevti qabyldady, dep habarlaıdy Aqordanyń baspasóz qyzmeti.
Prezıdent aımaqtyń áleýmettik-ekonomıkalyq damýy týraly esepti tyńdady. Narıman Tóreǵalıevtiń aıtýynsha, óńirlik jalpy ónim kólemi úsh jylda 13,6 paıyzǵa ulǵaıyp, 2026 jyldyń 1 qańtarynda 5 trıllıon teńgege jetti. Ótken jyldyń qorytyndysy boıynsha tartylǵan ınvestıtsııa kólemi 874,5 mıllıard teńgeni qurap, aldyńǵy jylmen salystyrǵanda 16,6 paıyzǵa ósti.
Qasym-Jomart Toqaevqa buǵan deıingi tapsyrmalarynyń oryndalýy týraly egjeı-tegjeıli aqparat berildi. Jýyrda Qarashyǵanaq ken ornynda qýattylyǵy jylyna 5 mıllıard tekshe metr gaz óńdeýge jetetin zaýyt qurylysy bastalady. Investıtsııalyq joba quny – 1,7 trıllıon teńge. Sondaı-aq jyl sońyna deıin Jaıyq ózeni arqyly ótetin kópirdiń qurylysyn bastaý josparlanyp otyr.
Memleket basshysyna sońǵy úsh jylda oblysta jalpy quny 138 mıllıard teńge bolatyn 121 jańa áleýmettik nysan salynǵany týraly baıandaldy. 1542 shaqyrym avtokólik joldary jóndeýden ótti. Qazaqstan – Reseı shekarasyndaǵy «Syrym» avtokólik ótkizý beketi qaıta jańǵyrtylyp jatyr. Kelesi jyly «Tasqala» beketinde dál osyndaı joba bastalady. Budan bólek, jańadan salynǵan jáne jańǵyrtylǵan tórt temirjol vokzaly el ıgiligine berildi.
Byltyr aýyl sharýashylyǵynyń jalpy ónim kólemi 320 mıllıard teńgege jetti. «Aýyl amanaty» baǵdarlamasy qolǵa alynǵannan beri 1414 joba qarjylandyrylyp, 2 myńǵa jýyq jańa jumys orny ashyldy.
«Qaladan – aýylǵa» óńirlik baǵdarlamasy aıasynda myńnan astam adam aýylǵa qonys aýdardy. Barlyq 218 otbasy baspanamen qamtylyp, olarǵa áleýmettik qoldaý sharalary kórsetildi.
Kezdesý sońynda Qasym-Jomart Toqaev óńirdi odan ári damytý, kommýnaldyq ınfraqurylymdy jedel jańǵyrtý jáne turǵyndardyń turmys sapasyn arttyrý jumysyn jalǵastyrýdy tapsyrdy.
Osyǵan deıin Memleket basshysy Ortalyq saılaý komıssııasynyń tóraǵasy Nurlan Ábdirovti qabyldady.
