Memleket basshysy bastaǵan aýqymdy ózgeristerdiń kýási bolyp otyrmyz – Nursultan Shoqanov
ASTANA. KAZINFORM – Qazaqstan Halyq partııasynyń (QHP) tóraǵasy Nursultan Shoqanov Ulttyq akademııalyq kitaphana ǵımaratynda ornalasqan Quryltaı saılaý ýchaskesinde daýys berdi.
Daýys bergennen keıin Nursultan Shoqanov jýrnalısterge búgingi kúnniń mańyzyna toqtaldy.
– Búgin bizde shyn máninde merekelik kóńil-kúı. Óte mańyzdy kún. Onyń mańyzyn asyra baǵalaý qıyn. Menińshe, búgingi kúnniń nátıjesine qaramastan, odan barlyq qazaqstandyqtar men elimiz utady, – dedi Nursultan Shoqanov.
Onyń aıtýynsha, Memleket basshysy bastaǵan aýqymdy ózgeristerdiń kýágeri ári qatysýshysy bolý árbir qazaqstandyq úshin úlken mártebe.
– Birinshiden, Memleket basshysy bastaǵan osyndaı aýqymdy ózgeristerdiń kýágeri ári qatysýshysy bolý bárimiz úshin úlken mártebe. Biz Konstıtýtsııany qabyldadyq, endi Quryltaı saılaýy ótip jatyr. Bul – tarıhı kún. Sondyqtan búgingi kúnnen de barlyq qazaqstandyqtar utady dep esepteımin, – dedi partııa tóraǵasy.
Nursultan Shoqanov saılaýdyń ótý sapasy men saılaýaldy úgit-nasıhat jumystarynyń aıtarlyqtaı ózgergenin atap ótti.
– Biz barlyǵymyz partııalar arasyndaǵy qyzý pikirtalastar men túrli pikirlerdiń ashyq aıtylǵanyna kýá boldyq. Men saılaýdy 800-ge jýyq sheteldik baıqaýshy baqylaǵanyn estidim. Biz baqylaý júrgizgen sheteldik delegatsııalarmen de kezdestik. Shyn máninde, Qazaqstan naǵyz demokratııanyń qandaı bolatynyn jáne saılaýdyń qanshalyqty ashyq, ádil ári tikeleı ótýi múmkin ekenin kórsetti, – dep atap ótti Nursultan Shoqanov.
Aıta keteıik, daýys berýshiler legi artyp, saılaý ýchaskelerine kelýshiler kóbeıip keledi.
