Memleket basshysy Bas prokýror Berik Asylovty qabyldady

ASTANA. KAZINFORM - Prezıdentke elimizdegi zańdylyqtyń jaı-kúıi jáne qadaǵalaý qyzmetiniń basym baǵyttaryna qatysty júrgizilgen jumystardyń qorytyndysy týraly esep berildi, dep habarlaıdy Aqordanyń baspasóz qyzmeti. 

Qasym-Jomart Toqaevqa quqyqtyq kómek kórsetý jáne shetelde jasyrynǵan qylmyskerlerdi izdestirý jónindegi halyqaralyq yntymaqtastyqtyń nátıjeleri baıandaldy. Birqatar rezonans týdyrǵan qylmystyq is boıynsha kúdiktiler ustalyp, sot tóreligin júzege asyrý úshin Qazaqstanǵa qaıtaryldy.

Memleket basshysyna aktıvterdi qaıtarý máselesi boıynsha Eýropa Keńesi, Interpol, EYDU jáne EQYU sııaqty bedeldi halyqaralyq uıymdarmen ózara túsinistikke qol jetkizilgeni jaıynda málimet berildi.

Berik Asylovtyń aıtýynsha, el ekonomıkasyna 2,7 trıllıon teńge salǵan 220 ınvestorǵa quqyqtyq kómek kórsetilgen. Atalǵan jumystyń nátıjesinde ınvestorlardyń memlekettik bılik ınstıtýttaryna degen senimi arta tústi. Kezdesý barysynda tikeleı ınvestıtsııa tartý boıynsha óńirlerde atqarylyp jatqan isterdiń naqty mán-jaıy qarastyryldy.

Sonymen qatar Prezıdentke elimizdegi krımınogendik ahýal jáne qylmystyq-quqyq salasyndaǵy azamattardyń konstıtýtsııalyq quqyqtaryn qamtamasyz etýge baǵyttalǵan sharalar týraly baıandaldy.

Kezdesý sońynda Qasym-Jomart Toqaev elimizde zańdylyqty odan ári nyǵaıtý jáne azamattardy, sonyń ishinde kásipkerlerdi qylmystyq elementterden qorǵaý sharalaryn qabyldaýdy tapsyrdy.

Memleket basshysy ınvestıtsııalyq jobalarǵa qatysty ýákiletti organdardyń sheshimderi boıynsha «prokýrorlyq súzgini» tıimdi paıdalaný mańyzdy ekenin aıtty. Osy oraıda Prezıdent atalǵan organdardyń tartylatyn ınvestıtsııa týraly derekteriniń durystyǵyna baqylaýdy jáne jaýapkershilikti kúsheıtý qajettigine nazar aýdardy.

Sondaı-aq shetelge zańsyz shyǵarylǵan aktıvterdi izdeýge jáne qaıtarýǵa baǵyttalǵan zamanaýı tehnologııalardy keńinen qoldaný kerek ekenin atap ótti.