Memleket basshysy Bas prokýror Berik Asylovty qabyldady
ASTANA. KAZINFORM — Prezıdent Qasym-Jomart Toqaev elimizdegi zańdylyqtyń jaı-kúıi jáne prokýratýra organdarynyń basym baǵyttar boıynsha atqarǵan jumysynyń nátıjeleri týraly esepti tyńdady.
Berik Asylov krımınogendik ahýaldy baqylaý, sondaı-aq qylmystyń aldyn alý baǵytynda qabyldanǵan sharalar jóninde baıandady.
Bıylǵy 9 aıda qylmystyq quqyq buzýshylyqtar sany 14,6 paıyzǵa, sonyń ishinde qoǵamdyq oryndardaǵy quqyqbuzýshylyq 22,3 paıyzǵa, kóshedegi zańǵa qaıshy áreketter 20,1 paıyzǵa azaıǵan.
Quqyq qorǵaý organdarymen jáne múddeli qurylymdarmen birlesip, ınternet-alaıaqtyqqa, esirtki qylmysyna jáne basqa da qaýipti qylmys túrlerine qarsy kúres boıynsha jan-jaqty sharalar qabyldandy.
Búgingi tańda jalpy somasy 1,3 trıllıon teńge bolatyn aktıvter qaıtarylǵany jóninde málimdedi. Osy qarajat esebinen 466 áleýmettik ınfraqurylymnyń qurylysy men rekonstrýktsııasy qarjylandyryldy, onyń 378-i aıaqtaldy.
Atap aıtqanda, alty oblysta iri medıtsına nysandary, Astana qalasynda Q. Muńaıtpasov atyndaǵy fýtbol stadıony paıdalanýǵa berildi. Sonymen qatar Balqash, Pavlodar jáne Arqalyq áýejaılaryn jańǵyrtý jumystary aıaqtaldy.
Aktıvterdi qaıtarý, ekstradıtsııalaý jáne qylmys jasaǵan adamdardy berý máseleleri boıynsha halyqaralyq yntymaqtastyq damyp keledi.
Bas prokýratýra 39 ıýrısdıktsııamen 92 ekijaqty kelisimge qol qoıdy. Qazaqstanǵa 50 adam ekstradıtsııalandy, al shet memleketterge 123 adam berildi.
Memleket basshysynyń 2025 jylǵy 17 jeltoqsandaǵy Jarlyǵyn oryndaý maqsatynda ınvestorlardy qorǵaýdyń júıeli modeli jolǵa qoıylǵanyn aıtty.
Jyl basynan beri 2886 ınvestorǵa kómek kórsetildi. Prokýrorlar 3,5 myń ınvestıtsııalyq jobanyń iske asýyn qadaǵalap otyr. Ulttyq tsıfrlyq ınvestıtsııalyq platformany «Tsıfrlyq qadaǵalaý» júıesimen ıntegratsııalaý túıtkildi máselelerdi ýaqtyly anyqtaýǵa múmkindik beredi.
Áleýmettik-ekonomıkalyq salada 413 myń azamattyń konstıtýtsııalyq quqy qalpyna keltirilgenin atap ótti. Sonyń ishinde 200 myńnan astam jumyskerdiń eńbek quqyǵy qorǵaldy. Eńbekaqy boıynsha 2,5 mıllıard teńge, alıment boıynsha 7,9 mıllıard teńge bereshek óndirildi.
Prokýrorlar memleket qarjysyn jumsaý kezinde somasy 535 mıllıard teńge zań buzýshylyqqa tosqaýyl qoıdy. Bıýdjetke 66,4 mıllıard teńge qaıtaryldy.
Kezdesý barysynda «Zań men tártip» ıdeologııasyn, ásirese, jastar arasynda ilgeriletý, sondaı-aq qadaǵalaý qyzmetine tsıfrlyq tehnologııalardy jáne jasandy ıntellektini engizý máselelerine aıryqsha nazar aýdaryldy.
Prezıdent barlyq salada zańdylyqty qamtamasyz etý, zań ústemdigi men qoǵamdyq qaýipsizdikti nyǵaıtý, sonyń ishinde elektoraldyq kezeńde quqyqtyq tártipti saqtaý sharalaryn úılestirý jumystaryn jalǵastyrýdy tapsyrdy;
Sondaı-aq Ádiletti Qazaqstannyń konstıtýtsııalyq qundylyqtaryn múltiksiz saqtaý qajettigi atap ótildi.
