Memleket basshysy barsha hrıstıandy Pasha merekesimen quttyqtady

ASTANA. KAZINFORM – Memleket basshysy Qasym-Jomart Toqaev Pasha merekesimen quttyqtady. Bul týraly Aqordanyń baspasóz qyzmeti habarlady.

— Qurmetti otandastar! Elimizde turatyn barsha hrıstıandardy Pasha merekesimen quttyqtaımyn! Bul jarqyn meıram jurtty rýhanı tazaryp, jańarýǵa úndeıdi. Dindar adamdarǵa úmit syılap, olardy qýanyshqa bóleıdi. Bıyl Pashany dúnıe júzindegi pravoslav, katolık jáne protestant qaýymy bir kúnde atap ótip jatyr. Munyń sımvoldyq máni zor, — dedi Prezıdent.

Memleket basshysy basqa dindermen qatar hrıstıan dini de qoǵamda mańyzdy ról atqaratynyn aıtty.

— Basqa dindermen qatar hrıstıan dini de qoǵamymyzda mańyzdy ról atqarady. Ejelden bıik gýmanıstik ıdealdardy dáriptep kele jatqan pasha dástúrleri otbasylyq qundylyqtardy saqtaýǵa jáne halqymyzdyń yntymaǵyn arttyrýǵa yqpal etedi, azamattarymyzdy meıirimdilik pen kelisimge shaqyrady. Jalpyulttyq birlik, barsha etnos pen konfessııa ókilderi arasyndaǵy tatýlyq pen ózara túsinistik qashanda Qazaqstannyń turaqty ósip-órkendeýiniń myzǵymas tuǵyry bolyp qala beredi dep senemin. Pasha merekesi ár shańyraqty mahabbat pen shattyqqa keneltsin! Elimizdiń ár azamatyna zor densaýlyq, baq-bereke jáne tolaǵaı tabys tileımin, — dedi Qasym-Jomart Toqaev.