Memleket basshysy Bala quqyqtary jónindegi ýákil Dınara Zákıevany qabyldady
ASTANA. KAZINFORM – Qasym-Jomart Toqaevqa bala quqyqtaryn qorǵaý jáne jas urpaqtyń densaýlyǵyn saqtaý men nyǵaıtý baǵytynda atqarylǵan jumystar týraly málimet berildi. Bul týraly Aqordanyń baspasóz qyzmeti habarlady.
Sońǵy eki jylda balalardyń quqyqtaryn qorǵaý jáne qaýipsizdigin qamtamasyz etý, zorlyq-zombylyqtyń, sýıtsıdtiń jáne jasóspirimder arasyndaǵy qylmystyń aldyn alý maqsatynda birqatar shara qabyldanyp, baǵdarlamalar men zańdar ázirlendi. Atalǵan jumys aıasynda Bala quqyqtary jónindegi ýákildiń bastamasymen zańnamaǵa 120 túzetý engizildi.
Bıyl 13 óńirdegi jáne 73 eldi mekendegi ahýalǵa monıtorıng júrgizilgenin, sonyń ishinde 272 mekemedegi balalarǵa jasyryn saýaldama jasalǵanyn, 173 otbasyda tárbıelenip jatqan jetkinshekterdiń jaǵdaıymen tanysqanyn aıtty. Tekseris qorytyndysy boıynsha bala quqyqtaryn qorǵaýǵa qatysty qabyldanǵan zań normalaryn buzǵan 171 derek anyqtalǵan.
Aımaqtardaǵy 112 otbasylyq qoldaý ortalyǵynyń tıimdi jumys istep jatqany belgili boldy. Olar turmystyq zorlyq-zombylyqtyń aldyn alý men balalar quqyǵyn qorǵaý maqsatynda ashylǵan bolatyn.
Oblys ákimdikteri janynan bala quqyqtaryn qorǵaý jónindegi basqarma qurý jumystary qolǵa alyndy. Sondaı-aq olardyń qyzmetin aıqyndaıtyn zań jobasy ázirlenip jatyr.
Qazirgi kezde «Qazaqstan halqyna» qory seriktesterimen birge 49 ońaltý ortalyǵyn ashty. Bul mekemelerde erekshe qajettilikteri bar balalarǵa qyzmet kórsetiledi.
Kezdesýde «Qazaqstan balalary» baǵdarlamasyn ázirleý, onlaın qaýipsizdikti qamtamasyz etý jáne kámeletke tolmaǵan azamattardyń jeke málimetterin qorǵaý máseleleri talqylandy.
Prezıdent bala quqyqtaryn qorǵaýǵa kepildik berý júıesin nyǵaıtyp, jetkinshekterdi jan-jaqty qoldaý tetigin qalyptastyrý úshin jergilikti atqarýshy organdar men óńirlik ýákilderdiń kúsh-jigerin jumyldyrý mańyzdy ekenine nazar aýdardy. Sonymen qatar mektepterdegi ınklıýzıvti bilim berý isin damytýdy kózdeıtin qosymsha sharalar qabyldaýdy tapsyrdy.
Aıta keteıik, Bala quqyqtary jónindegi ýákil Dınara Zákıeva Májilistiń jalpy otyrysynan keıin BAQ ókilderine kámeletke tolmaǵandarǵa jynystyq zorlyq jasaǵandardyń statıstıkasyn atady.