Prezıdent balalardy sýıtsıdke ıtermeleıtin jaǵdaılarmen kúresý úshin keshendi sharalar qabyldaýdy tapsyrdy
ASTANA. KAZINFORM — Bala quqyqtary jónindegi ýákil Prezıdentke bir jyl ishinde balalardyń quqyqtaryn qorǵaý jáne qaýipsizdigin qamtamasyz etý maqsatynda atqarylǵan jumystar jóninde esep berdi. Bul týraly Aqordanyń baspasóz qyzmeti málim etti.
Qasym-Jomart Toqaev áıelder men balalardyń quqyqtaryn qorǵaý baǵytynda qabyldanǵan zańnamalyq ózgeristerdiń nátıjesinde turmystyq zorlyq-zombylyqtyń aldyn alý sharalary kúsheıtilgenin jáne balalarǵa qatysty zorlyqtyń kez kelgen túrine jaza qatańdatylǵanyn atap ótti. Zańǵa Bala quqyqtary jónindegi ýákil men azamattyq qoǵam sektory birlese usynǵan normalar toptamasy endi.
Dınara Zákıeva qazir atalǵan zańnamalyq normalardy naqty júzege asyrý úshin belsendi jumys júrgizilip jatqanyn aıtty.
«111» biryńǵaı baılanys júıesi iske qosyldy. Sondaı-aq mektepterde býllıngpen kúresý úshin KiVa baǵdarlamasy jáne 2024 jyldyń qyrkúıek aıynan bastap qaýipsizdik sabaqtary engiziledi», — dedi ol.
Bala quqyqtary jónindegi ýákildiń aıtýynsha:
— balalarǵa arnalǵan medıtsınalyq-áleýmettik mekemelerdiń qyzmetkerleri úshin arnaıy oqý kýrsy bastalady;
— qorǵanshylyq jáne qamqorshylyq organdaryn kúsheıtý máselesi pysyqtalyp jatyr;
— «Samuryq-Qazyna» ulttyq ál-aýqat qorymen, sondaı-aq «Qazaqstan halqyna» jáne «Qamqorlyq» qorlarymen seriktestik negizde 6 aýtızm ortalyǵy, 11 óńirlik ońaltý ortalyǵy ashyldy.
Bala quqyqtary jónindegi ýákildiń esebin tyńdaǵan soń Prezıdent quqyqtyq saýattylyq deńgeıin kóterý jáne oqýshylar arasynda «Zań men tártip» qaǵıdatyn nasıhattaý mańyzdy ekenin aıtty.
«Osyǵan baılanysty Qasym-Jomart Toqaev Túrkistanda ótken Ulttyq quryltaıdyń ekinshi otyrysynda bergen tapsyrmasyna sáıkes Birtutas tárbıe baǵdarlamasy ázirlengenin eske saldy. Atalǵan baǵdarlama óskeleń urpaqtyń boıyna adamı jáne ulttyq qundylyqtardy sińirip, olardyń shyǵarmashylyq qabiletin shyńdaýdy, óz betinshe áreket etý jáne kreatıvti oılaý daǵdylaryn damytýdy kózdeıdi. Dınara Zákıevaǵa osy baǵdarlamany júzege asyrý úshin pedagogter men ata-analardyń arasyndaǵy jumysty úılestirý mindeti júkteldi», — delingen habarlamada.
Kezdesý barysynda jetim jáne ata-anasynyń qamqorlyǵynsyz qalǵan balalarǵa turǵyn úı bólý, sondaı-aq aýyldyq jerlerde jetkinshekterge arnalǵan ınfraqurylymdy damytý máseleleri talqylandy.
Memleket basshysy balalar men jóspirimder arasynda sýıtsıdke ıtermeleıtin jaǵdaılardyń beleń alýyna jol bermeý úshin keshendi sharalar qabyldaý qajet ekenine nazar aýdardy. Sonymen qatar Qasym-Jomart Toqaev balalar travmatızmi men oqys oqıǵalardyń aldyn alý máselesin aıryqsha baqylaýda ustaýdy tapsyrdy.
Eske sala keteıik, buǵan deıin Dınara Zákıeva «Tumystyq zorlyq-zombylyqqa qatysty zańǵa» qarsy petıtsııaǵa pikir bildirgenin jazǵan bolatynbyz.
