Memleket basshysy BAÁ-niń Qazaqstandaǵy elshisin qabyldady

Memleket basshysy BAÁ-niń Qazaqstandaǵy elshisi Muhammed Saıd Muhammed ál-Arıkıdi qabyldady, dep habarlaıdy Aqordanyń baspasóz qyzmeti. 

Kezdesýde buǵan deıin joǵary deńgeıde qol jetkizilgen ýaǵdalastyqtardy júzege asyrý máseleleri talqylandy.

Memleket basshysy saýda-ekonomıka salasy ekijaqty baılanystardyń basty baǵyty sanalatynyn aıtty. Bul rette eki eldiń úkimetterine taıaý keleshekte saýda-sattyq kólemin 1 mıllıard dollarǵa deıin jetkizý mindeti júktelgenin eske saldy.

Prezıdent Strategııalyq ınvestıtsııalyq jobalar týraly birlesken málimdemege sáıkes energetıka, aýyl sharýashylyǵy, kólik jáne logıstıka salalaryndaǵy qarym-qatynasty odan ári nyǵaıtýdyń mańyzdylyǵyna nazar aýdardy.

Qasym-Jomart Toqaev Ámirlikterdiń Masdar kompanııasymen jańartylatyn energııa kózderi salasyndaǵy birlesken jobalardy ilgeriletý boıynsha yntymaqtastyqtyń qarqyndy damyp kele jatqanyn, sondaı-aq AD Ports Group jáne Terminals Holding kompanııalarymen birlesip kólik-logıstıka jelisi men áýe tasymaly qyzmetterin keńeıtýdi kózdeıtin ınvestıtsııalyq jobalardyń júzege asyryla bastaǵanyn atap ótti.

Áńgimelesý barysynda aqparattyq tehnologııalardy damytý baǵytyndaǵy yqpaldastyq máselesine aıryqsha mán berildi.

Prezıdent Qazaqstan men Ámirlikter arasyndaǵy dostyq pen yntymaqtasty nyǵaıtýǵa zor eńbek sińirgeni úshin Muhammed Saıd Muhammed ál-Arıkıdi II dárejeli «Dostyq» ordenimen marapattady.