Memleket basshysy Azııa oıyndarynyń júldegerlerin qabyldady
Prezıdent sportshylardy júldelerimen quttyqtap, birqataryna Qurmet gramotalaryn tabystady. Memleket basshysy Rızabek Aıtmuhan erkin kúresten qazaqtan shyqqan tuńǵysh álem chempıony bolǵanyn eske saldy, dep habarlaıdy Kazinform Aqordaǵa silteme jasap.
Báseke óte joǵary bolǵan Azıada oıyndarynda el quramasy 10 altyn, 22 kúmis, 48 qola medal ıelendi. Atletterimiz nysana kózdeý, eskek esý, velojarys, djıý-djıtsý sportynan úzdik shyqty. Memleket basshysy karateden jalpy komandalyq esepte birinshi oryn alǵan Qazaqstan quramasyn erekshe atap ótip, osy sport túrinen Azıadaǵa qatysqan 8 sportshynyń bári jeńis tuǵyryna kóterilgenine nazar aýdardy.
Qasym-Jomart Toqaev sportshylarymyzdyń jeńiske jetýine bapkerler jáne basqa da mamandar aıryqsha úles qosqanyna toqtaldy. Osy oraıda Memleket basshysy sportta jeńis pen jeńilis qatar júretinin atap ótti.
– Qajyrly eńbek pen jeńiske degen muqalmas erik-jigerdiń arqasynda árqaısyńyz joǵary nátıjege qol jetkizdińizder. Alaıda elimizdiń jalpy kórsetkishi ótken Olımpıada men Azıada oıyndarynan da óte jaqsy bolýy múmkin edi. Muny ashyq aıtýymyz kerek. Boks, aýyr atletıka, erkin jáne grek-rım kúresi dástúrli túrde el quramasynyń qorjynyna júlde salyp, aıtarlyqtaı úles qosatyn. Jeńil atletıka, sporttyń komandalyq túrleri jankúıerlerimizdi kóbirek qýanyshqa bóleıtin. Barlyq sport túri boıynsha ketken qatelikterdi túzetý úshin aýqymdy jumys atqarý qajet, - dedi Prezıdent.
Sondaı-aq, Memleket basshysy olqylyqtardan naqty sabaq alyp, aldaǵy Parıj Olımpıadasyna tyńǵylyqty daıyndalýǵa shaqyrdy.
Jıynda 2023 jylǵy XIX jazǵy Azııa oıyndarynyń stend atýdan eki dúrkin jeńimpazy jáne qola júldegeri Ásem Orynbaı, kanoe jáne baıdarka esýden XIX jazǵy Azııa oıyndarynyń jeńimpazy jáne kúmis júldegeri Sergeı Emelıanov, erkin kúresten álem chempıony Rızabek Aıtmuhan, karateden XIX jazǵy Azııa oıyndarynyń jeńimpazy Nurqanat Ájiqanov, nysana kózdeý sportynan ulttyq quramanyń bas bapkeri Olga Dovgýn sóz sóıledi.
Prezıdent sportshylarǵa jáne bapkerler korpýsynyń jumysyna tabys tiledi. Sodan keıin Qasym-Jomart Toqaev birqatar sportshyǵa Qazaqstan Respýblıkasy Prezıdentiniń Qurmet gramotalaryn tabystady.
