Memleket basshysy Azııa ınfraqurylymdyq ınvestıtsııalar bankiniń prezıdenti Tszoý Tszıaıdi qabyldady
ASTANA. KAZINFORM – Kezdesýde Qasym-Jomart Toqaev Azııa ınfraqurylymdyq ınvestıtsııalar banki elimizdiń mańyzdy strategııalyq seriktesi sanalatynyn atap ótti, dep habarlaıdy Aqordanyń baspasóz qyzmeti.
Qarjy ınstıtýty Qazaqstanda basymdyqqa ıe ınfraqurylymdyq jáne ınvestıtsııalyq jobalardy iske asyrýǵa qatysady.
Prezıdent búgin qol qoıylǵan Seriktestik týraly negizdemelik kelisimdi quptady. Atalǵan qujattyń ornyqty ekonomıkalyq damýdy ilgeriletý men óńirlik yntymaqtastyqty nyǵaıtýda máni zor. Qasym-Jomart Toqaev Tszoý Tszıaıdi jýyrda Azııa ınfraqurylymdyq ınvestıtsııalar bankiniń prezıdenti bolyp taǵaıyndalýymen quttyqtady.
– Sizdiń osy laýazymdaǵy saparyńyzdy Qazaqstannan bastaǵanyńyzdy joǵary baǵalaımyz. Bul ekijaqty yntymaqtastyqqa tyń serpin beretin jaqsy nyshan dep sanaımyz. Bankpen birge jalpy somasy 2,6 mıllıard dollardan asatyn 9 jobany júzege asyryp jatyrmyz. Munyń bári ózara yqpaldastyǵymyz ben baılanysymyzdy jandandyra túsetinine senimdimin, – dedi Memleket basshysy.
Tszoý Tszıaı Azııa ınfraqurylymdyq ınvestıtsııalar banki Qazaqstannyń energetıka, kólik jáne áleýmettik ınfraqurylym sektorlaryndaǵy birqatar iri jobaǵa qoldaý kórsetkenin jetkizdi.
– Ystyq yqylasyńyz ben uzaq jyldar boıy Azııa ınfraqurylymdyq ınvestıtsııalar bankine kórsetken qoldaýyńyz úshin alǵys aıtamyn. Qazaqstan men basqa da aktsıonerlerdiń maǵan artqan senimine dán rızamyn. Bank qyzmetinde alǵashqy onjyldyqtaǵy jetistikterge negizdelgen sabaqtastyqty saqtaımyn. Sondaı-aq tutynýshylardyń ózgerip jatqan suranystaryna jedel jaýap berý úshin qarjy ınstıtýtyn odan ári órkendetýge tyrysamyn, – dedi bank jetekshisi.
Qasym-Jomart Toqaev pen Tszoý Tszıaı birlesken qyzmet aıasyn tereńdetýge aıtarlyqtaı múmkindik bar ekenine toqtaldy. Taıaý jyldary Qazaqstan ınfraqurylym sektoryn jańǵyrtý boıynsha aýqymdy jospardy júzege asyrýǵa nıetti. Azııa ınfraqurylymdyq ınvestıtsııalar banki osy strategııalyq bastamalarǵa belsene atsalysýǵa daıyn.
Qazirgi ýaqytta bank Kókshetaý qalasyndaǵy kópbeıindi aýrýhana qurylysy, qýaty 220 MVt bolatyn jel elektr stansasy, Jezqazǵan – Qaraǵandy, Aqtóbe – Qarabutaq – Ulǵaısyn avtokólik joldarynyń ýchaskeleri jáne Almaty qalasyn aınalyp ótetin temirjol salý jobalaryna qarjy bólýde.
Aıtta keteıik, osyǵan deıin Memleket basshysy Sunwah Group korporatsııasynyń tóraǵasyn qabyldaǵan bolatyn.
