Qasym-Jomart Toqaev Ilham Álıevti tarıhı deklaratsııaǵa qol qoıylýymen quttyqtady
ASTANA. KAZINFORM - Qasym-Jomart Toqaev Ilham Álıevti AQSh Prezıdenti Donald Tramptyń belsendi ári tıimdi atsalysýymen Vashıngtonda Ázerbaıjan men Armenııa arasyndaǵy qaqtyǵysty beıbit jolmen retteý týraly tarıhı deklaratsııaǵa qol qoıylýymen quttyqtady.
Bul týraly Aqordanyń baspasóz qyzmeti habarlady.
Qasym-Jomart Toqaev atalǵan qujatqa halyqaralyq quqyq qaǵıdattary men BUU jarǵysyna sáıkes qol qoıylǵanyn atap ótti.
Tıisinshe, bul Ázerbaıjan men Armenııanyń strategııalyq múddelerine tolyǵymen saı keledi, sondaı-aq Kavkazda halyqaralyq yntymaqtastyqtyń jan-jaqty damýyna yqpal etedi.
Qazaqstan Ázerbaıjannyń strategııalyq seriktesi retinde óńirde kópten kútken beıbitshiliktiń ornaýyn shyn nıetpen qoldaıdy.
Memleket basshysy Astananyń aldaǵy ýaqytta kelissózge arnalǵan alań usynýǵa daıyn ekenin rastady. Qasym-Jomart Toqaev Prezıdent Ilham Álıevtiń kóshbasshylyǵymen Ázerbaıjannyń halyqaralyq arenada abyroı-bedeli arta túskenin atap ótti.
Memleketter basshylary joǵary deńgeıdegi baılanysty odan ári jalǵastyrýǵa ýaǵdalasty. Ázerbaıjan Prezıdenti Qazaqstan Prezıdentiniń quttyqtaýyna rızashylyq bildirip, uzaq jyldarǵa ulasqan nátıjesiz kelissózderden keıin osyndaı kelisimge kelýdiń tarıhı mańyzy zor ekenine nazar aýdardy. Ilham Álıev óz eliniń Qazaqstanmen san qyrly yntymaqtastyqty odan ári nyǵaıtýǵa múddeli ekenin jetkizdi.
Aıta keteıik, jýyrda Armenııa men Ázerbaıjan beıbit retteý týraly birlesken deklaratsııaǵa qol qoıdy.
Qasym-Jomart Toqaev bul oqıǵany tarıhı jetistik dep baǵalady.