Memleket basshysy Ázerbaıjan prezıdenti Ilham Álıevti týǵan kúnimen quttyqtady
ASTANA. KAZINFORM — Memleket basshysy Ázerbaıjan Prezıdentimen telefon arqyly sóılesti, dep habarlaıdy Aqordanyń baspasóz qyzmeti.
Qasym-Jomart Toqaev Ilham Álıevti týǵan kúnimen quttyqtap, onyń baýyrlas ázerbaıjan halqynyń ıgiligi jolynda atqaryp jatqan jaýapty memlekettik qyzmetine tabys tiledi.
— Qazaqstan Prezıdenti Ázerbaıjannyń egemendigi men memlekettiligin nyǵaıtýda, sondaı-aq turaqty ekonomıkalyq ósimdi qamtamasyz etip, eliniń halyqaralyq arenadaǵy bedelin arttyrýda Ilham Álıevtiń aıryqsha ról atqaratynyna toqtaldy. Memleketter basshylary qazaq-ázerbaıjan qatynastary qarqyndy damyp kele jatqanyn atap ótti. Strategııalyq seriktestik pen odaqtastyq baılanystardy odan ári nyǵaıtý, saýda-ekonomıkalyq jáne mádenı-gýmanıtarlyq salalardaǵy yntymaqtastyqty kúsheıtý perspektıvasyn talqylady, — delingen habarlamada.
Áńgimelesý barysynda joǵary deńgeıde, sonyń ishinde Ilham Álıevtiń bıyl 20-21 qazan kúnderi Qazaqstanǵa jasaǵan memlekettik sapary barysynda qol jetkizilgen ýaǵdalastyqtardy sapaly júzege asyrýǵa erekshe nazar aýdaryldy. Sonymen qatar prezıdentter óńirlik jáne halyqaralyq kún tártibindegi ózekti máseleler jóninde pikir almasty.
Budan buryn Qasym-Jomart Toqaev AQSh prezıdentimen telefon arqyly mazmundy áńgime órbitkenin jazǵanbyz.
