Memleket basshysy Ázerbaıjan Prezıdenti Ilham Álıevpen kezdesý ótkizdi
ASTANA. KAZINFORM – Qasym-Jomart Toqaev Azııadaǵy ózara is-qımyl jáne senim sharalary keńesiniń sammıtine qatysýǵa shaqyrǵany jáne qonaqjaılyq kórsetkeni úshin Ilham Álıevke alǵys aıtyp, sammıttiń joǵary deńgeıde uıymdastyrylǵanyn atap ótti, dep habarlaıdy Aqordanyń baspasóz qyzmeti.
Qazaqstan Prezıdenti Ázerbaıjan Keńeske tóraǵalyq etken kezeńde naqty bastamalardy ilgeriletýge jáne Uıymnyń halyqaralyq bedelin kúsheıtýge súbeli úles qosqanyna nazar aýdardy.
Kezdesý barysynda memleketter basshylary óńirdegi biregeı joba – Transkaspıı talshyqty-optıkalyq baılanys jelisin iske qosýdyń mańyzyna toqtaldy. Teńiz tabanymen júrgizilgen jeli eki eldiń tsıfrlyq baılanysyn kúsheıtip, Eýropa men Azııa arasynda taǵy bir tsıfrlyq dálizdiń paıda bolýyna yqpal etedi. Osylaısha, tutas óńir tyń múmkindikterge qol jetkizedi.
Prezıdentter saýda-ekonomıkalyq qarym-qatynastyń qarqyny artyp kele jatqanyn málimdep, ózara taýar aınalymyn 1 mıllıard dollarǵa jetkizýge nıetti ekenin rastady.
Budan bólek, Qazaqstannyń energııa resýrstaryn Ázerbaıjan arqyly tasymaldaý aýqymyn ulǵaıtý, sondaı-aq ónerkásip, energetıka, kólik, logıstıka jáne aýyl sharýashylyǵy salalarynda birlesken jobalardy júzege asyrý máselelerin talqylady.
Taraptar mádenı-gýmanıtarlyq yqpaldastyq nyǵaıyp, bilim berý, týrızm salalaryndaǵy áriptestik keńeıe túskenin jáne parlamentaralyq yntymaqtastyq jandanyp kele jatqanyn jetkizdi.
Kezdesý sońynda Qasym-Jomart Toqaev pen Ilham Álıev qazaq-ázerbaıjan strategııalyq seriktestigin odan ári tereńdetýge, sondaı-aq ekijaqty kún tártibiniń barlyq baǵyty boıynsha qol jetkizilgen ýaǵdalastyqtardy dáıekti túrde iske asyrýǵa beıil ekenin rastady.
Aıta keteıik, osyǵan deıin Qasym-Jomart Toqaev AÓSShK-ni biregeı halyqaralyq forým dep atady.
