Memleket basshysy «Aıbyn» HІI halyqaralyq áskerı-patrıottyq jastar jıynynda sóılegen sóziniń tolyq mátini

«Aıbyn-2026» baǵdarlamasyna áskerı-sporttyq, ıntellektýaldyq, shyǵarmashylyq jáne áskerı-qoldanbaly sport túrleri boıynsha jarystar endi. Bıylǵy jıyn Qazaqstannyń birneshe aımaǵynan, sondaı-aq Ázerbaıjan, Qyrǵyzstan, Reseı jáne Ózbekstan elderinen kelgen 50-den astam komandanyń basyn qosty.

Memleket basshysy bul óskeleń urpaqtyń rýhyn shyńdaıtyn, olardy otanshyldyqqa tárbıeleıtin óte mańyzdy is-shara ekenin atap ótti.

— Baıraqty básekede elimizdiń eń myqty, eń jigerli jas sarbazdary laıyqty óner kórsetti. Sondaı-aq Ázerbaıjan, Qyrǵyzstan, Ózbekstan jáne Reseıden kelgen dostas, baýyrlas memleketterdiń jastary baq synady. Búgin men bárińizge zor rızashylyǵymdy bildiremin. Dúbirli doda elimiz úshin shyn máninde asa mańyzdy kezeńde ótip jatyr. Naýryz aıynda Qazaqstannyń jańa Konstıtýtsııasy qabyldandy. Bul — memleketimizdiń keleshegin aıqyndaıtyn, ultymyzdyń taǵdyryna tikeleı áser etetin tarıhı oqıǵa. Tutas jurtymyzdyń arman-muratyn toǵystyrǵan Ata zań, eń aldymen, óskeleń urpaqtyń ıgiligi úshin qabyldandy. Kez kelgen eldiń bolashaǵy — ózderińiz sekildi otanshyl, bilimdi, eńbekqor, jasampaz jáne batyl jastardyń qolynda. Qazaqstannyń bedelin arttyryp, kóshin alǵa bastaıtyn da — jalyndy jastar! Men sizderge zor úmit artamyn! — dedi Qasym-Jomart Toqaev.

Prezıdent 1 shilde kúni memleketimizdiń Bas qujaty — Konstıtýtsııa zańdy kúshine enetinin, osylaısha, el damýynyń múldem jańa dáýirine qadam basatynymyzdy eske saldy.

— Jańa Konstıtýtsııa barlyq memlekettik jáne qoǵamdyq ınstıtýttardyń jańǵyrýyna negiz qalady. Mundaı kúrdeli ózgerister elimizdiń 35 jyldyq tarıhynda da, odan buryn da bolǵan emes. ıAǵnı Qazaqstan sapaly ǵylym negizinde órkendeý men tehnologııalyq órleý jolyna tústi. Degenmen qoǵam bir maqsatqa jumylyp, yntymaq-birlik tanytpasa, kez kelgen, tipti muqııat saralanǵan memlekettik jospardyń ózi qaǵaz júzinde qalady. Týǵan jerge — Qazaqstan Respýblıkasyna adal qyzmet etýge umtylatyn bilimdi, erik-jigeri mol otanshyl jastar elimizdi kórkeıtedi. Negizgi zańnyń túpki máni de osydan kórinedi: Konstıtýtsııa shyn máninde barlyq parasatty jáne jasampaz kúshterdi, naǵyz patrıottardy elimizdiń strategııalyq baǵdarynyń, ıaǵnı, reformalardyń jalpyulttyq jospary men maqsattary tóńiregine biriktiretin berik tuǵyrnama ispettes. Jańa Konstıtýtsııamyz — barsha halyqtyń, ásirese, óskeleń urpaqtyń adamgershilik jáne quqyqtyq baǵdary, ómir jolyndaǵy temirqazyǵy. Osy baǵyttan aınymasaq, qoǵamdaǵy turaqtylyqty saqtaımyz, azamattarymyz zań men el múddesine qurmetpen qaraıtyn laıyqty ómirge qol jetkizedi, — dedi Qasym-Jomart Toqaev.

Memleket basshysynyń aıtýynsha, patrıot bolý degenimiz — memlekettiń saıasaty men strategııasyn is júzinde qoldaý, el ıgiligine úles qosý, týǵan jerdiń taǵdyry úshin jaýapkershilik alý.

— Osy qasıetti boryshtyń qatarynda Otan qorǵaý erekshe, kıeli paryz sanalady. Áskerı qyzmet — azamattyqtyń belgisi ári qasterli konstıtýtsııalyq mindet. Biz Qarýly kúshterdi dáıekti túrde jańǵyrtýdy qolǵa aldyq. Armııaǵa jáne áskerı bilim berý júıesine tsıfrlyq tehnologııalar, jasandy ıntellekt pen daıarlyqtyń ozyq standarttary belsendi túrde engizilýde. Bul — zaman talaby. Sondyqtan qazirgi kúrdeli syn-qaterlerge tótep berý úshin daıyndyǵymyz saqadaı-saı bolýy qajet. Árbir múmkindikti memlekettiń irgesin bekemdep, qýatyn arttyrýǵa paıdalaný kerek. Bizdiń negizgi mindetimiz — kásibı deńgeıi joǵary áskerılerdi tárbıeleýdiń tıimdi júıesin qalyptastyrý. Qazirgi ýaqytta áskerıler jan-jaqty damyǵan, qoǵam ómiriniń barlyq salasyna úles qosa alatyn úlgili tulǵa ekenin kórsetýge tıis. Búgin arnaıy kelgen Shoqan Ýálıhanov atyndaǵy Áskerı kolledjdi osyndaı tabysty jumystyń jarqyn mysaly retinde ataýǵa bolady. Bıyl oqý ornynyń qurylǵanyna 30 jyl tolady. Osy ýaqyt ishinde kolledj serjanttyq quramǵa 4,5 myńnan asa joǵary bilikti maman daıarlady. Bul biregeı tájirıbe halyqaralyq deńgeıde joǵary baǵaǵa ıe boldy, — dedi Prezıdent.

Qasym-Jomart Toqaev elimiz óskeleń urpaqtyń jan-jaqty damýyna basa mán beretinin jetkizdi.

— Aldymyzda strategııalyq mańyzdy mindet tur. Memleketimizdiń basty qundylyqtaryn jete túsinip, júrekpen qabyldaıtyn jastar tárbıeleýimiz kerek. Bul qundylyqtar — Táýelsizdik pen Egemendik, eldiń aýmaqtyq tutastyǵy, azamattarymyzdyń zańdy quqyqtary men bostandyqtary, Qazaqstandy Ádil, Quqyqtyq jáne Ozyq memleketke aınaldyrý. Ásker qataryndaǵy qyzmet shynaıy patrıottardy tárbıeleıtin mańyzdy, tipti, basty mektepke aınalǵany jón. Dál osy sebepti áskerı dástúrlerdi «Adal azamat — Sarbaz — Otan qorǵaýshy» qaǵıdatyna saı jańǵyrtý jónindegi bastamaǵa qoldaý bildirdim. Budan bylaı áskerge shaqyrý, ant qabyldaý jáne áskerı qyzmetten bosatý sekildi úsh kezeń memlekettik protokol tájirıbesine sáıkes jańa formatta, erekshe saltanatpen uıymdastyrylady. Mundaı este qalarlyq rásimder atalǵan is-sharalardyń mán-mańyzyn arttyryp, urpaqtar sabaqtastyǵyn nyǵaıtady. Sonymen qatar jastar arasynda jáne jalpy qoǵamda áskerdiń bedelin aıtarlyqtaı kóteredi. Sarbaz bolý — zor mártebe. Qarýly kúshter sapynda boryshyn ótegen ár azamat kópshilik qurmetine bólenýi kerek. Barshamyz birge kúsh jumyldyrsaq, ata-analar áskerı salany tańdaǵan ul-qyzdaryn maqtan tutatyndaı jaǵdaıǵa jetetinimizge senimdimin. Basqasha aıtqanda, Otan aldyndaǵy jaýapkershilik barlyq salada joǵary deńgeıde adal eńbek etýden kórinedi. Áskerı qyzmet te osy sanatta. Memlekettik rámizderge qurmet jáne azamattyq jaýapkershilik jastar dúnıetanymynyń ózegine aınalýǵa tıis. Soǵys órti tutanyp, áskerı qaqtyǵystar ýshyqqan, memleketter sanktsııadan kóz ashpaǵan zamanda ómir súrip jatyrmyz. Álemdegi ahýaldy aldyn ala boljaý barǵan saıyn qıyndap barady. Osyndaı kezde el keleshegine enjar qaraýdyń saldary keıin ózimizge aýyr tııýi múmkin, — dedi Memleket basshysy.

Osy oraıda, Prezıdent elimizde jasaqtalǵan «Jas sarbaz» qozǵalysynyń aıryqsha róline nazar aýdardy.

— Ozyq qundylyqtardy dáripteıtin uıymnyń qatarynda 280 myńnan astam mektep oqýshysy jáne stýdent bar. Áskerı-patrıottyq birlestikterde tárbıe alǵan azamattardyń kóbi bolashaq ómirin áskerı qyzmetpen, quqyq qorǵaý organdarymen jáne ulttyq qaýipsizdik júıesimen baılanystyrady. Men Memleket basshysy retinde jastarymyzdyń osyndaı umtylysyn tolyq qoldaımyn. Sizderdiń aralaryńyzda qazirdiń ózinde eleýli tabysqa qol jetkizip, qurdastary men izinen ergen inilerine úlgi kórsetip júrgen jandar bar. Búgin osy jıynǵa Saǵadat Nurmaǵambetov atyndaǵy Qurlyq áskerleriniń Áskerı ınstıtýtyn támamdaǵan úzdik túlek Arman Ońdasynov qatysyp otyr. Jaqynda Memlekettik rámizder kúni aıasynda oǵan aǵa leıtenant ofıtserlik ataǵyn óz qolymmen tabystadym. Sonymen qatar búgingi is-sharaǵa «Aıbyn» halyqaralyq jarysynyń ótken jyldardaǵy jeńimpazdary keldi. Jyl saıynǵy áskerı-patrıottyq jıynda elimizdiń ár óńiriniń jáne dostas elderdiń talantty jastary bas qosady. Munyń máni zor. Oraıly sátti paıdalanyp, Reseı, Ózbekstan, Qyrǵyzstan jáne Ázerbaıjan elderinen kelgen qonaqtarymyzǵa bastamany qoldap, oǵan belsendi qatysqany úshin alǵys aıtamyn, — dedi Qasym-Jomart Toqaev.

Memleket basshysy atalǵan aýqymdy joba osy jyldar aralyǵynda naǵyz patrıotızm mektebine aınalǵanyn, myńnan asa jigitter men qyzdardy bir týdyń astyna biriktirgenin aıtty.

— Jastar munda ádil básekege túsip, temirdeı tártiptiń ne ekenin biledi. Qysyltaıańda bir-birine qol ushyn sozýǵa jáne komandada jumys isteýge úırenedi. Jarystar tek fızıkalyq tózimdilik pen kúshti ǵana synap qoımaıdy, aqyl-oı ushqyrlyǵyn, tapqyrlyq pen shyǵarmashylyq qabiletti de shyńdaıdy. Sondyqtan «Aıbyn» jıynynyń eń basty mıssııasy — Qarýly kúshter qatarynda kásibı deńgeıi joǵary, ıntellektýaldy elıta qalyptastyrý. Mundaı kezdesýler halyqaralyq yntymaqtastyqty nyǵaıtady. Ózara tileýlestikti kúsheıtip, halyqtarymyz arasyndaǵy dostyq, birlik jáne túsinistik qaǵıdattarynyń bekı túsýine septigin tıgizedi, — dedi Prezıdent.

Qasym-Jomart Toqaev is-sharaǵa qatysýshylardy «Aıbyn» áskerı-patrıottyq jastar jıynynyń aıaqtalýymen quttyqtady.

— Dańqty qolbasshy Baýyrjan Momyshulynyń «Erlik — eldiń qasıeti» degen qanatty sózi bar. Elge qyzmet bilimge umtylýdan, qorshaǵan ortaǵa qamqor bolýdan, keleshek aldyndaǵy jaýapkershilikti tereń sezinýden bastalady. Sondyqtan árbir Otan qorǵaýshy azamat kózi ashyq, kókiregi oıaý, elge janashyr, antqa adal, talapty ári tabandy bolýǵa tıis. Osy kúnderi sizder naǵyz dostyq pen ózara qurmettiń, uıymshyldyq pen myzǵymas birliktiń jarqyn úlgisin kórsettińizder. Jaraısyzdar! Jeńimpaz bolǵan komandalardy shyn júrekten quttyqtaımyn! Rýhty jastardyń osylaı bir alańda bas qosyp, tájirıbe almasýy memleketterimiz arasyndaǵy yntymaqtastyq pen senimdi nyǵaıta túseri sózsiz. Ár sarbazdyń aıbyny asqaq bolsyn! Barshańyzǵa sáttilik tileımin! Qasıetti Otanymyz — Qazaqstannyń aspany ashyq, bolashaǵy jarqyn bolsyn! — dep túıindedi sózin Prezıdent.