Memleket basshysy aýyl sharýashylyǵyn tsıfrlandyrýdyń mańyzyna nazar aýdardy

ASTANA. KAZINFORM – Prezıdent Qasym-Jomart Toqaev Aýyl sharýashylyǵy eńbekkerleriniń ekinshi forýmynda sóılegen sózinde aýyl sharýashylyǵyn tsıfrlandyrýdyń mańyzdylyǵyn atap ótti. Bul týraly Aqordanyń baspasóz qyzmeti habarlady. 

– Agroónerkásip keshenin tsıfrlandyrýmen naqty aınalysqan jón. Ózderińizge málim, jappaı tsıfrlandyrý jáne barlyq salaǵa jasandy ıntellekt tehnologııasyn engizý Joldaýymda basty mindet retinde ataldy. Aýyl sharýashylyǵy úshin munyń máni óte zor. Sebebi jańa tehnologııalar shyǵyndy aıtarlyqtaı azaıtyp, ónimdilikti ulǵaıtýǵa múmkindik beredi. Aqmola oblysynda ótken keńeste jınalǵan ónimdi tıisinshe saqtaý jáne shyǵyndy meılinshe azaıtý sharalaryn qamtamasyz etýdi tapsyrdym. Elimizdegi kóptegen sharýa qojalyǵynyń qarjylyq turaqtylyǵy osyǵan baılanysty.

Aldymyzda tsıfrlyq tehnologııalar jáne jasandy ıntellekt elementteriniń kómegimen memlekettiń bıdaı qoryn esepke alatyn jáne baqylaıtyn tıimdi júıe qurý mindeti tur. Ol úshin qoldanystaǵy astyq qambalaryn jańǵyrtyp, zamanaýı elevatorlar salý qajet. Bıdaıdy qabyldaýdy jáne jóneltýdi esepke alatyn elektrondyq júıeniń bolýy jeke elevatorlar qurylysyn qarjylandyrý baǵdarlamasynyń mindetti bir sharty bolýǵa tıis. Búginde kóptegen sharýalar tehnologııalyq jańashyldyqty (smart-ferma, agrodron, jer serigi tehnologııasy jáne JI) belsendi qoldana bastady. Biraq jalpy el kóleminde qandaı da bir júıeli ózgerister bolyp jatyr dep aıtýǵa áli erte, - dedi Prezıdent.

Eske sala keteıik, budan buryn Qasym-Jomart Toqaevtyń Aýyl sharýashylyǵy eńbekkerleriniń ekinshi forýmynda sóz sóılegenin jazǵanbyz.