Memleket basshysy Aýyl sharýashylyǵy mınıstri Aıdarbek Saparovty qabyldady
ASTANA. KAZINFORM - Prezıdentke agrarlyq salany damytýdyń bıylǵy 9 aıdaǵy qorytyndysy baıandaldy. Mınıstrdiń aıtýynsha, búginde eginniń 98 paıyzy jınalyp, 25,2 mıllıon tonna astyq bastyrylǵan. Ortasha ónimdilik ár gektardan 15,5 tsentnerdi quraıdy. Dıqandar 1,2 mıllıon tonna qant qyzylshasyn jınamaq. Bul – rekordtyq kórsetkish. Sonymen qatar jem-shóp túrlerin de kóptep jınaý josparlanyp otyr.
Memleket basshysynyń tapsyrmasyna sáıkes, egin egý jáne jınaý naýqanyn qarjylandyrý kólemin ulǵaıtý sharalary qolǵa alyndy. Bıyl osy maqsatqa alǵash ret 5 paıyz mólsherlememen 580 mıllıard teńge bólindi. Qarjy sharýalarǵa sýbsıdııasyz, tikeleı beriledi. Bul ótken jylmen salystyrǵanda úsh ese kóp. Aıdarbek Saparovtyń aıtýynsha, 2025 jyly atalǵan baǵyttaǵy qarjylandyrý kólemin 900 mıllıard teńgege deıin ulǵaıtý kózdelip otyr. Onyń ishinde jeńildetilgen lızıng arqyly aýyl sharýashylyǵy tehnıkasyn alýǵa 200 mıllıard teńge bólinedi. Tómen paıyzben beriletin nesıeni tıimdi paıdalanyp, sybaılas jemqorlyq táýekelderin azaıtý úshin memlekettik qoldaý tetikterine ózgeris engizildi.
Qasym-Jomart Toqaevqa bıylǵy 9 aıda 796 myń tonnadan astam et óndirilgeni jóninde málimet berildi. Bul ótken jyldyń osy kezeńimen salystyrǵanda 4,5 paıyzǵa artyq. Sút óndirý kólemi 4,2 paıyzǵa ósip, 2,8 mıllıon tonnany quraǵan.
Aýyl sharýashylyǵy ónimderin qaıta óńdeýdi damytýdyń 2028 jylǵa deıingi keshendi jospary aıasynda kásiporyndardyń júktemesin ulǵaıtý jáne otandyq ónimdi ótkizý naryqtaryn keńeıtý úshin tıisti sharalar qabyldanyp jatyr. Sút, et, kúnbaǵys, kúrish, júgeri jáne qaraqumyq óńdeýdi 70 paıyzǵa deıin jetkizý kózdelgen.
Budan bólek, Memleket basshysyna vedomstvonyń kelesi jylǵa arnalǵan jospary tanystyryldy. Mınıstr egistikterdi jedel ártaraptandyrý jumystary jalǵasatynyn aıtty. Ol úshin sýdy kóp shyǵyndaıtyn jáne bir ǵana daqyl túri egiletin alqaptardy azaıtyp, kóbirek paıda ákeletin ónim túrlerin ósirýge basymdyq beriledi.
Kezdesý sońynda Qasym-Jomart Toqaev Aýyl sharýashylyǵy mınıstrine agroónerkásip keshenin odan ári damytý jáne azyq-túlik qaýipsizdigin qamtamasyz etý boıynsha birqatar tapsyrma berdi.
