Memleket basshysy «Atletıko de Madrıd Qazaqstan» fýtbol akademııasyna bardy
QONAEV. KAZINFORM — Prezıdent Qasym-Jomart Toqaev óńirdegi biregeı sport jobasy — «Atletıko de Madrıd Qazaqstan» halyqaralyq deńgeıdegi fýtbol akademııasynyń qyzmetimen tanysty. Bul týraly Aqordanyń baspasóz qyzmeti málim etti.
Memleket basshysy akademııanyń 180 balaǵa arnalǵan jataqhanasyn aralap kórdi. Qazir munda elimizdiń ár túkpirinen kelgen 116 bala jattyǵady.
— Akademııa oıynshylaryn ıspandyq bapkerler iriktep, oǵan Qazaqstannyń barlyq óńirinen 4 myńnan asa bala qatysty. Ortalyqta jas fýtbolshylardyń tolyqqandy oqý úderisine, jattyǵýlary men jeke daıarlyǵyna barlyq jaǵdaı jasalǵan, — delingen habarlamada.
Qasym-Jomart Toqaevqa akademııany damytý jáne sporttyq ınfraqurylymdy keńeıtý jospary kórsetildi. Osy oraıda jasandy kógaly bar eki ashyq fýtbol alańyn, 500 oryndyq jabyq manej jáne ákimshilik-turmystyq keshenniń jańa ǵımaratyn salý kózdelgen.
Prezıdentke akademııa ornyn tańdaýda balalardy shyńdaı túsetin tabıǵat faktorlary eskerilgeni aıtyldy.
Almaty oblysynyń Talǵar aýdanyndaǵy taýdyń taza aýasy men jaǵymdy klımat bala aǵzasynyń tez qalpyna kelýine septigin tıgizedi.
— Budan keıin Qasym-Jomart Toqaev jabyndysy FIFA talaptaryna saı keletin fýtbol alańyn kórdi, sondaı-aq dopty ıgerý tehnıkasy men ıspan ádistemesi boıynsha komandalyq is-qımyl daǵdylaryn pysyqtaýǵa kirisken jas fýtbolshylardyń jattyǵýyn tamashalady, — dep habarlady Aqordadan.
Іs-sharaǵa Ispanııanyń Qazaqstandaǵy elshisi Lýıs Fransısko Martınes Montes, «Atletıko Madrıd» fýtbol klýby dırektorlar keńesiniń múshesi Davıd Vılıa, atalǵan klýbtyń akademııa isteri jáne halyqaralyq damý jónindegi dırektorynyń orynbasary Marııa Teresa Kırıvı qatysty.
Eske sala keteıik, Prezıdent jumys saparymen Almaty oblysyna bardy.
