Memleket basshysy astanada aýyzsý máselesi qalaı sheshilip jatqanyn aıtty
ASTANA. KAZINFORM - Kommýnaldyq ınfraqurylymdy jedel jańǵyrtýdyń mańyzy zor. Bul týraly Memleket basshysy Qasym-Jomart Toqaev Astanany damytý jónindegi keńeste sóılegen sózinde aıtty.
-Kóshi-qon qarqynynyń artýy, iri qalalardaǵy qurylystyń tyǵyz salynýy ınjenerlik jeliler men shahar tirshiligin qamtamasyz etetin nysandarǵa aıtarlyqtaı salmaq salady. Birneshe jyl buryn elordada aýyz sýdyń tapshylyǵy sezildi. Onyń sapasyna qatysty syn aıtyldy. Osy máselelerdi sheshý úshin jańa sý qubyrlary tartylyp, sorǵy-súzgi stantsııalary salynyp jatyr. Olardyń keıbiri paıdalanýǵa berildi,-dedi Prezıdent.
Sondaı-aq ol sózinde eldiń bas qalasyn sýmen turaqty qamtamasyz etý – tehnıkalyq mindet qana emes, ulttyq qaýipsizdik máselesi ekenin atap ótti.
-Munda usaq-túıek nárse bolmaıdy, barlyǵyn aldyn-ala oılastyryp, ýaqtyly jasaý qajet. Tórtinshi aýyz sý stantsııasyn mejeli merzimde salǵan jón. Bıyl Astana sý qoımasyn aýqymdy tazartýdyń birinshi kezeńi aıaqtaldy. Jumystyń osy qarqynyn joǵaltpaý mańyzdy. Ekinshi káriz-tazartý qurylysy men qalaishilik tazartý júıesin iske qosý kerek,-dedi Qasym-Jomart Toqaev.
Osyǵan deıin Memleket bashsysy elordada jol-kólik oqıǵalarynyń kóbeıgenine alańdaýshylyq bildirgen bolatyn.
