Memleket basshysy: Astana tek ortalyq kósheleri aınadaı jarqyrap turatyn qala bolmaýy tıis
ASTANA. KAZINFORM — Prezıdent elorda zamanaýı ýrbanıstıkanyń úlgisi bolýy kerek ekenin aıtty. Bul týraly Aqordanyń baspasóz qyzmeti habarlady.
Memleket basshysynyń aıtýynsha, úılesimdi qala keńistigin qalyptastyrýǵa aıryqsha mán berý qajet. Azamattardyń turmys-tirshiligi men jumysyna barynsha qolaıly jaǵdaı jasaý barlyq deńgeıdegi ákimderdiń basty mindeti bolýy tıis.
— Al elorda zamanaýı ýrbanıstıkanyń úlgisi bolýy kerek. Óıtkeni onyń mártebesi bólek. Bul oraıda Astanada qazirdiń ózinde birshama nátıjege qol jetkizdik. Qalalyq ortany damytýdyń biryńǵaı tásili aıqyndaldy. Muny bıyl jazda elimizde ótken sammıtter kezinde ózge de memleketter basshylary baıqaǵan. Mysaly, Tóraǵa Sı Tszınpın qalamyzdyń kelbeti aıtarlyqtaı jaqsarǵanyn aıtyp, joǵary baǵasyn berdi. Bul — álemdik iri derjavalardyń basshylary Qazaqstanǵa kelgende bizdiń qalalarymyzdyń kelbetine mán berip qaraıdy degen sóz. Muny qaperde ustaý kerek, — dedi Toqaev.
Prezıdent Astanany abattandyrý isindegi oń ózgeristerge toqtaldy.
— «Jańa kelbet» baǵdarlamasy aıasynda bes jyl ishinde shahardyń tarıhı bóligindegi 150 ǵımarattyń qasbetin jańartý josparlanyp otyr. Sonymen qatar kósheler abattandyrylady. Jalpy, sońǵy eki jylda Astanada kóptegen qoǵamdyq keńistik paıda boldy. Jasyl jelek mol egilip, demalys aımaqtary kóbeıdi. Bul óte jaqsy. Muny elorda turǵyndary oń baǵalap otyr. Endi osy aýmaqtardy tıisti deńgeıde saqtaýǵa tıispiz. Bul áýelgi kezekte elordada turatyn jáne shaharǵa qonaqqa keletin Qazaqstan azamattaryna tikeleı baılanysty. Osy isti Іshki ister mınıstrligi, polıtsııa departamenti jiti baqylaǵany jón, — dedi ol.
Qasym-Jomart Toqaev Astana tek ortalyq kósheleri aınadaı jarqyrap turatyn qala bolmaýy tıis ekenin basa aıtty.
— Shetkeri aýdandarǵa da kóńil bólý kerek. Qalany bezendirý jumystaryna bıýdjetten bólek demeýshiler qarajatyn da tartýǵa bolady. Jańa jylda kásipkerlerimizdiń basyn qosýdy josparlap otyrmyn. Olarǵa taǵy da úndeý jasaımyn. Qatań sharalar qabyldaımyn. Túptiń túbinde, Otandy súıý — ortaq borysh. Sondyqtan oń jaǵalaýdaǵy saýda, ónerkásip oramdary men turǵyn úı alaptaryn jańartý jumystaryn jandandyrǵan jón. Kóriktendirý máselesi azamattardy árdaıym tolǵandyrady. Bul — túsinikti, sondyqtan olardyń osylaı aıtýǵa qaqysy bar. Degenmen ákimdik te elorda turǵyndary men qala qonaqtarynan joǵary mádenıetti talap etýi kerek, — dedi Prezıdent.
Memleket basshysy Qasym-Jomart Toqaev Astanany damytý jónindegi keńes ótkizdi. Keńes barysynda Prezıdent memlekettik basqarýda ozyq japon tájirıbesin usyndy.