Memleket basshysy «Astana Motors» kompanııasynyń negizin qalaýshy Nurlan Smaǵulovty qabyldady

ASTANA. KAZINFORM – Prezıdentke kásiporyn jumysynyń nátıjesi, Qazaqstandaǵy avtomobıl ónerkásibin damytýǵa jáne onyń jergilikti úlesin arttyrýǵa baǵyttalǵan ındýstrııalyq jobalardy júzege asyrý jaıynda málimet berildi - dep jazdy Aqordanyń baspasóz qyzmeti. 

Nurlan Smaǵulovtyń aıtýynsha, «Astana Motors» quramyndaǵy kompanııalar byltyr jergilikti jáne respýblıkalyq bıýdjetke 140 mıllıard teńge kóleminde salyq, baj, alymdar jáne basqa da mindetti tólemder tólegen. Búginde kásiporynda 6489 adam jumys isteıdi. Onyń ishinde 1615 adam óndiriste qyzmet etedi.

Hyundai Trans Kazakhstan jáne Hyundai Trans Almaty zaýyttary byltyr 48857 jeńil kólik jáne 981 kommertsııalyq tehnıka shyǵarǵan.

Qasym-Jomart Tokaevqa Chery, GWM (Haval), Changan markaly avtokólikterdi óndiretin mýltıbrendtik Astana Motors Manufacturing Kazakhstan zaýytynyń qurylysy júrgizilip jatqany týraly baıandaldy. Bul zaýyttyń qýaty jylyna 90 myń avtokólik shyǵarýǵa jetedi. Onyń 40 paıyzy ishki naryqta satylsa, 60 paıyzy eksportqa jiberiledi. Qurylys jumystaryn 2025 jyldyń aqpan aıynda aıaqtaý josparlanǵan. «Astana Motors» kompanııasy 2027 jyly dánekerleý jáne shanaqty boıaýmen qosa alǵanda, kólikti tolyǵymen usaq bólshekterden qurastyrýǵa kóshýdi basty maqsat etip otyr.

Memleket basshysy óńdeý ónerkásibin, sonyń ishinde mashına jasaý isin damytý ındýstrııalyq saıasattyń basymdyǵy sanalatynyn atap ótti.