Ashkóz, kórseqyzar, jemqorlyqqa beıim adam eshqashan patrıot bola almaıdy – Prezıdent

ASTANA. KAZINFORM – Memleket basshysy Qasym-Jomart Toqaev Qarjylyq monıtorıng agenttiginde ótken jıynda sóılegen sózinde saýatsyz, ásirese ashkóz, kórseqyzar, jemqorlyqqa beıim adam eshqashan patrıot bola almaıtynyn erekshe atap ótti. Bul týraly Aqordanyń baspasóz qyzmeti jazdy. 

– Qarjylyq barlaý qyzmetkerlerinen naǵyz jaýapkershilik pen jasampazdyq turǵysynan qaraıtyn otanshyldyqty talap etemin. Mundaı qasıetke ıe adamdar jemqorlyqtan, ashkózdikten, saýatsyzdyqtan ada bolýǵa tıis. Saýatsyz, ásirese ashkóz, kórseqyzar, jemqorlyqqa beıim adam eshqashan patrıot bola almaıdy. Árıne, ol ózin patrıot sanaýy, alaýlatyp, jalaýlatyp sóıleýi múmkin. Alaıda ol patrıot emes jáne ony bári biledi. Sondyqtan bul arada otanshyldyqty durys túsine bilgenimiz abzal. Men bul jóninde Qyzylordada ótken Ulttyq quryltaı otyrysynda aıttym.

Qazirgi ýaqytta jańa Konstıtýtsııanyń mazmunyn qarap jatyrmyz. Biz osy ózgerister aıasynda patrıotızm týraly uǵymdy naqtylap, jaýapkershilikke ári jasampazdyqqa qurylǵan otanshyldyqty aıqyndaı alamyz dep oılaımyn. Naǵyz patrıot barlyq jerde, ol Qarjylyq monıtorıng agenttigi nemese memlekettik menshiktegi kásiporyn bolsyn, jeke kásipkerlik nysany, ýnıversıtet, mektep bolsyn, adal eńbek etýge tıis. Árkim óz jumysyn jaqsy atqarsa, ony patrıot dep sanaımyz. Jalpy, tekserý sharalary memlekettiń áleýmettik mindettemelerine qatysty jumysqa kesirin tıgizbeýi kerek. Bıýdjet qarajatyn ýaqtyly ıgerýge de kedergi keltirmeýi qajet. Aqparattyq, kommertsııalyq qaýipsizdikti jáne jeke derekterdi qorǵaý máselesin nazarda ustaǵan jón, - dedi Qasym-Jomart Toqaev. 

Buǵan deıin Prezıdent Qarjylyq monıtorıng agenttiginde jıyn ótkizgenin jazǵan edik.