Memleket basshysy Armenııanyń Syrtqy ister mınıstri Ararat Mırzoıandy qabyldady
ASTANA. KAZINFORM – Prezıdent Armenııanyń Syrtqy ister mınıstrin qabyldaý barysynda eki el prezıdentteriniń byltyr Qazaqstan men Armenııaǵa jasaǵan saparlary ózara qarym-qatynasty jan-jaqty damytýǵa serpin bergenin atap ótti. Bul týraly Aqordanyń baspasóz qyzmeti habarlady.

– Sizdiń Astanaǵa alǵashqy resmı saparyńyz eki el arasyndaǵy yntymaqtastyqty odan ári nyǵaıtý turǵysynan mańyzdy. Bizdiń armıan halqy men Sizdiń memleketke degen qurmetimiz bólek, – dedi Prezıdent.
Qasym-Jomart Toqaev elimiz Beıbitshilik týraly kelisim jobasy boıynsha kelissózderdiń aıaqtalyp, Erevan men Baký arasyndaǵy memleketaralyq qarym-qatynastyń jandanýyn qoldaıtynyn jetkizdi. Prezıdenttiń pikirinshe, bul aıtýly oqıǵa Armenııa men Ázerbaıjan arasynda beıbit kelisim ornatýǵa negiz qalap, aımaqtyń Qazaqstan jáne Ortalyq Azııa memleketterimen yntymaqtastyǵyn belsendi túrde damytýǵa, sondaı-aq qaýipsizdikti nyǵaıtýǵa yqpal etedi.

Óz kezeginde Armenııanyń Syrtqy ister mınıstri qonaqjaılyq tanytqany úshin rızashylyǵyn bildirdi.
– Biz Sizdiń eki el arasyndaǵy yqpaldastyqqa qatysty ustanymyńyzdy qoldaımyz, – dedi Ararat Mırzoıan.
Ol Armenııa men Qazaqstannyń Syrtqy ister mınıstrlikteri jáne basqa da vedomstvolary Qasym-Jomart Toqaevtyń byltyr Erevanǵa jasaǵan resmı sapary barysynda qol jetkizilgen ýaǵdalastyqtardy júzege asyrý boıynsha jumys istep jatqanyn jetkizdi.
Kezdesý barysynda saýda-ekonomıkalyq, ınvestıtsııalyq, kólik-logıstıkalyq, mádenı-gýmanıtarlyq salalardaǵy ekijaqty baılanysty ilgeriletý perspektıvasy qarastyryldy. Qazaqstan Prezıdenti otandyq bıznes ókilderiniń Armenııaǵa taýar tasymalyn 350 mıllıon dollarǵa deıin ulǵaıtýǵa daıyn ekenin málimdedi.