Memleket basshysy Armenııa Premer-mınıstrimen telefon arqyly sóılesti
ASTANA. KAZINFORM — Qazaqstan Prezıdenti Premer-mınıstr Nıkol Pashınıandy Vashıngtonda Armenııa men Ázerbaıjan arasynda beıbitshilik ornatý týraly deklaratsııaǵa qol qoıylýymen quttyqtady. Bul týraly Aqorda málim etti.
Tarıhı mańyzy bar bul qujatqa Nıkol Pashınıannyń saıasatker retindegi alǵyrlyǵynyń arqasynda qol qoıyldy. Ol myqty saıası erik-jigerge ıe ekenin kórsetip, óz memleketiniń ulttyq múddesi jolynda strategııalyq kóregendilik tanytty.
Deklaratsııa Ońtústik Kavkazdaǵy aýqymdy halyqaralyq yntymaqtastyqqa, sondaı-aq Qazaqstan men Armenııa arasyndaǵy anaǵurlym qarqyndy ekonomıkalyq jáne ınvestıtsııalyq yqpaldastyqqa jol ashady.
Qasym-Jomart Toqaev Armenııa Premer-mınıstriniń jyl sońyna josparlanǵan resmı saparyna Astana ázirlik jumystaryn bastap ketkenin málimdedi. Qazaqstan kelissózderge óz alańyn usyna otyryp, Armenııa men Ázerbaıjan arasyndaǵy saıası dıalogqa odan ári septigin tıgizýge nıetti.
Nıkol Pashınıan jyly lebizi men qoldaýy úshin Memleket basshysyna alǵys aıtty. Sondaı-aq Qazaqstan tarapyna eki memleket arasynda beıbitshilik ornatýǵa qatysty kelissóz protsesiniń keıbir aspektileri jóninde málimet berip, bul máselede AQSh Prezıdenti Donald Tramp aıryqsha mámilegerlik ról atqarǵanyn atap ótti.
Premer-mınıstr Qazaqstannyń Armenııa men Ázerbaıjandy tatýlastyrýǵa qosqan úlesin oń baǵalady. Sonymen qatar ol ózara yntymaqtastyqty jandandyratyn jańa kelisimderge qol qoıý úshin Qazaqstanǵa bıyl arnaıy saparmen kelýge daıyn ekenin rastady.
Eske sala keteıik, buǵan deıin Armenııa men Ázerbaıjan beıbit retteý týraly birlesken deklaratsııaǵa qol qoıǵanyn jazǵan edik.