Memleket basshysy Armenııa Premer-mınıstrimen kelissóz júrgizdi
ASTANA. KAZINFORM — Memleket basshysy Qasym-Jomart Toqaev elimizge resmı saparmen kelgen Armenııa Premer-mınıstri Nıkol Pashınıanmen kelissóz júrgizgeni habarlandy. Bul týraly Aqordanyń baspasóz qyzmeti málimdedi.
Qasym-Jomart Toqaev Pashınıannyń Qazaqstanǵa alǵashqy sapary eki eldiń strategııalyq seriktestik deńgeıindegi qarym-qatynasynyń damýyna úlken serpin beretinin aıtty.
— Asa qurmetti Nıkol Vovaevıch, Qazaqstanǵa qosh keldińiz! Sizdiń saparyńyz óte mańyzdy. Eki eldiń strategııalyq seriktestik deńgeıindegi qarym-qatynasynyń damýyna úlken serpin beredi dep senemiz. Bul — Qazaqstanǵa alǵashqy saparyńyz. Shyn máninde, qazaq halqy Armenııa jurtyna, tarıhyna, salt-dástúrine, mádenıetine zor qurmetpen qaraıdy. Sapar barysynda birqatar mańyzdy kelisimge qol qoıylady, — dedi Toqaev.
Óz kezeginde Nıkol Pashınıan qos memleket arasyndaǵy yntymaqtastyqtyń jańa kezeńi Toqaev byltyr Armenııaǵa jasaǵan resmı saparynan bastaý alǵanyn atap ótti.
— Asa qurmetti Prezıdent myrza, meni Qazaqstanǵa resmı saparmen shaqyryp, Astanada qonaqjaılyq tanytqanyńyz úshin alǵys aıtamyn. Bul sapar bizdiń ekijaqty qarym-qatynasymyzǵa tyń serpin beredi. Qos memleket arasyndaǵy yntymaqtastyqtyń jańa kezeńi Sizdiń byltyr Armenııaǵa jasaǵan resmı saparyńyzdan bastaý aldy. Sonyń nátıjesinde mańyzdy kelisimderge qol qoıyldy. Onyń keıbiri júzege asyryldy, qalǵan bóligi oryndalý ústinde. Qazaqstanǵa resmı saparmen kelý — men úshin zor mártebe! — dedi Pashınıan.
Aıta keteıik, Qasym-Jomart Toqaev Armenııa Premer-mınıstrin Aqordada qarsy aldy.