Ázerbaıjan men Armenııanyń kelisimge qol qoıýy – AQSh Prezıdentiniń bitimgerlik mıssııasynyń arqasy
ASTANA. KAZINFORM - Prezıdent Qasym-Jomart Toqaev Vashıngtonda Ázerbaıjan men Armenııa elderi arasynda qol qoıylǵan kelisimdi tarıhı jetistik dep sanaıdy.
Bul týraly Aqordanyń baspasóz qyzmetinen málim boldy.
Baspasóz qyzmetiniń málimetterine qaraǵanda, atalǵan qujat qos memleket arasyndaǵy uzaqqa sozylǵan áskerı qaqtyǵysty túbegeıli toqtatyp, dıplomatııalyq qatynas ornatýǵa jáne berik bitim negizinde yntymaqtastyqty damytýǵa jol ashty.
Memleket basshysynyń pikirinshe, Ázerbaıjan men Armenııanyń mundaı kelisimge qol qoıýy – AQSh Prezıdenti Donald Tramptyń tegeýrindi ári tıimdi bitimgerlik mıssııasynyń arqasy. Ol Ázerbaıjan jáne Armenııa basshylaryn saıası erik-jiger tanytyp, strategııalyq turǵydan kóregen sheshim qabyldaýǵa kóndire aldy.
Prezıdent Qasym-Jomart Toqaev Qazaqstan da eki el arasyndaǵy osynaý mańyzdy ýaǵdalastyqqa qol jetkizýge eleýli úles qosty dep sanaıdy.
Elimiz beıbit kelisimniń negizgi sharttaryna qatysty syrtqy ister mınıstrleriniń deńgeıindegi kelissóz alańy retinde Almaty qalasyn usyndy. Mınıstrler arasyndaǵy kelissózder Almatyda ótti.
Aıta keteıik, osyǵan deıin Armenııa men Ázerbaıjan beıbit retteý týraly birlesken deklaratsııaǵa qol qoıdy.