Memleket basshysy Altyn Orda máselesin zerdeleý boıynsha irgeli bastamalardy qolǵa alýdy usyndy
ASTANA. KAZINFORM — Ádildik, ashyqtyq jáne mádenıetter dıalogi — Dala órkenıetine arqaý bolǵan qundylyqtar. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Men jaqynda Túrkistanda ótken Túrki memleketteri uıymynyń sammıtinde Dala órkenıetin dáripteýge arnalǵan arnaıy ortalyq qurýdy usyndym. Sonymen qatar Altyn Orda máselesin zerdelep júrgen shetel mamandaryn jumyldyryp, baspa salasyna qatysty irgeli bastamalardy qolǵa alý qajet. Kreatıvti ındýstrııa jáne medıa baǵytyndaǵy túrli jobalar, eń aldymen, akademııalyq zertteýlerge arqa súıeýi kerek, — dedi Qasym-Jomart Toqaev.
Memleket basshysynyń atap ótýinshe, jahandaný, jappaı tsıfrlandyrý jáne jasandy ıntellekt dáýirinde kóshpendilik, ıaǵnı, nomadızm tujyrymdamasy týraly jańasha kózqaras qalyptastyrý — óte mańyzdy.
— Búginde bul uǵymnyń sıpatyn «tsıfrlyq kóshpendilerdiń» jasampaz rýhy men sarqylmas kúsh-qýatynan aıqyn kórýge bolady. Ádildik, ashyqtyq jáne mádenıetter dıalogi — Dala órkenıetine arqaý bolǵan qundylyqtar. Osy memlekettilik dástúrin jan-jaqty zertteý búkil Ortalyq Eýrazııanyń uzaq merzimdi damýyna yqpal eteri sózsiz. Qazir bul aımaq jańa sıpattaǵy qaıta órleý, ıaǵnı, renessans kezeńine qadam basty dep aıtýǵa bolady, — dedi Prezıdent.
Snymen qatar Memleket basshysy Altyn Ordanyń memlekettik basqarý júıesin muqııat zerdeleý qajettigin aıtty.
