Prezıdentke mádenıet, aqparat jáne áleýmettik saıasattaǵy reformalar tanystyryldy
ASTANA. KAZINFORM — Memleket basshysy Premer-mınıstrdiń orynbasary — Mádenıet jáne aqparat mınıstri Aıda Balaevany qabyldady. Bul týraly Aqordanyń baspasóz qyzmeti málim etti.
Prezıdent Qasym-Jomart Toqaevqa mádenıet, aqparat jáne áleýmettik saıasat salalarynda jańa Konstıtýtsııa erejelerin júzege asyrý barysy, sondaı-aq azamattardyń turmys sapasyn kóterýdi kózdeıtin memlekettik saıasattyń negizgi baǵyttary baıandaldy.
Vıtse-premer zańnamany jańa Ata zańǵa sáıkestendirý, memlekettik aqparattyq saıasatty jetildirý, tsıfrlyq keńistikti ilgeriletý, azamattyq qoǵam ınstıtýttarymen ózara is-qımyldy nyǵaıtý, sondaı-aq otbasy jáne jastar saıasaty, volonterlik qyzmet pen qoǵamdyq baqylaý salalarynda atqarylyp jatqan jumystar týraly málimet berdi.
Memleket basshysyna jańa bilim, ǵylymı-aǵartýshylyq jáne shyǵarmashylyq nysandaryn qurý, dástúrli ónerdi qoldaý men bilikti maman daıarlaý baǵyttarynda elimizdiń mádenı ınfraqurylymyn jandandyrý jónindegi usynystar aıtyldy.
Memlekettik áleýmettik saıasatty iske asyrý máselelerine aıryqsha nazar aýdaryldy. Aıda Balaeva bilim, ǵylym, densaýlyq saqtaý, áleýmettik qorǵaý, jumyspen qamtý, sport jáne týrızm salalaryn órkendetý jaıynda áńgimeledi. Vedomstvoaralyq yqpaldastyqty kúsheıtýge, memlekettik qyzmetterdiń sapasy men qoljetimdiligin arttyrýǵa, adamı kapıtaldy damytýǵa, zamanaýı tsıfrlyq sheshimderdi engizýge jáne áleýmettik sala ınfraqurylymyn qalyptastyrýǵa erekshe mán berildi.
Prezıdent mádenıet, aqparattyq saıasat, oqý-aǵartý, áleýmettik qamtamasyz etý jáne densaýlyq saqtaý sııaqty mańyzdy salalardaǵy Úkimettiń atqarǵan jumysy týraly Premer-mınıstr orynbasarynyń aqparatyn oń baǵalady.
Sonymen birge Memleket basshysy ózekti áleýmettik máselelerdi jedel sheshý úshin tıisti vedomstvolar jumysyn odan ári jandandyrý qajet ekenine nazar aýdardy.
Aıta keteıik, buǵan deıin Memleket basshysy «Psıhologııalyq qyzmet týraly» Qazaqstan Respýblıkasynyń Zańyna qol qoıdy.
