Memleket basshysy álemdik neırohırýrgııa salasynyń ókilderimen kezdesti
ASTANA. KAZINFORM - Qasym-Jomart Toqaev Ýolter Edýard Dendı atyndaǵy neırohırýrgııa qoǵamdastyǵynyń dúnıejúzilik H kongresine qatysý úshin Astanaǵa kelgen álemdik neırohırýrgııa salasynyń ókilderin qabyldady, dep habarlaıdy Aqordanyń baspasóz qyzmeti.
Prezıdenttiń aıtýynsha, mundaı forýmnyń Qazaqstanda ótýi otandyq neırohırýrgııa jetistikteriniń keńinen moıyndalǵanyn kórsetedi. Sonymen qatar Memleket basshysy Kongress neırohırýrgııa salasyndaǵy halyqaralyq yntymaqtastyqty damytýǵa zor úles qosyp, ozyq tájirıbe men tehnologııa almasýǵa yqpal etetinine senim bildirdi.
– Ult saýlyǵy – kez kelgen eldiń qarqyndy damýynyń negizi. Sondyqtan densaýlyq saqtaý isin jan-jaqty órkendetý memlekettik saıasatymyzdyń negizgi basymdyǵy sanalady. Qazaqstan medıtsınalyq ınfraqurylymdy jańǵyrtýǵa, maman daıarlaýǵa, úderisterdi tsıfrlandyrýǵa jáne atalǵan salaǵa ınnovatsııalyq ázirlemelerdi engizýge mol qarjy bóledi, – dedi Prezıdent.
Qasym-Jomart Toqaev Qazaqstan neırohırýrgııada jasandy ıntellektini qoldanýǵa aıryqsha mán beretinine nazar aýdardy. Sol arqyly medıtsınanyń joǵary tehnologııaly salalaryn belsendi damytýdy qolǵa alǵanyn jetkizdi. Onyń aıtýynsha, tsıfrly jáne robotty tehnologııalardyń arqasynda otandyq neırohırýrgııa salasy órkendep keledi.
Memleket basshysy kezdesýge qatysýshylardyń álemdik medıtsınany damytýǵa qosqan eleýli úlesin erekshe atap ótti.
– Árqaısysyńyz – myńdaǵan adamnyń ómirin qutqarǵan joǵary deńgeıli mamansyzdar. Sizderdi eń qıyn jaǵdaıda da adamdardyń dertinen aıyǵyp ketýine úmit syılaıtyn izgi mıssııa biriktiredi. Astanada ótip jatqan neırohırýrgter kongresine qatysý úshin arnaıy keldińizder. Bul medıtsınada shekara joq ekenin kórsetedi. Neırohırýrgııada ǵylym men ınnovatsııa aıryqsha ról atqarady, – dedi Prezıdent.
Memleket basshysy Qazaqstan medıtsınalyq tehnologııalardy transfertteýge, sondaı-aq tájirıbe almasýǵa baǵyttalǵan halyqaralyq yntymaqtastyqty keńeıtýge nıetti ekenin aıtty.
– Neırohırýrgııa sııaqty joǵary tehnologııaly salada medıtsınalyq týrızmdi damytý isiniń áleýeti zor. Osy baǵytta tabysqa qol jetkizý úshin ornyqty memleketaralyq baılanysty jolǵa qoıýǵa daıynbyz, – dedi Prezıdent.
Óz kezeginde kezdesýge qatysýshylar Qazaqstandaǵy neırohırýrgııany damytý múmkindikterin joǵary baǵalap, maman daıarlaý jáne ozyq tehnologııamen almasý turǵysynan qoldaý bildirýge ýaǵdalasty.
Qasym-Jomart Toqaev mazmundy ári nátıjeli pikir almasý úshin rızashylyǵyn bildirdi. Sondaı-aq Densaýlyq saqtaý mınıstrine neırohırýrgııaǵa, jalpy medıtsına salasyna ozyq tehnologııalardy engizý sharalaryn jandandyrýdy, Qazaqstanda sheteldikterdi emdeý boıynsha kórshi memlekettermen úkimetaralyq kelisim jasaý týraly Ulttyq neırohırýrgııa ortalyǵynyń basshysy Serik Aqsholaqovtyń usynysyna qatysty jumys júrgizýdi tapsyrdy.
Jıynda Ýolter Edýard Dendı atyndaǵy neırohırýrgııalyq qoǵamdastyqtyń prezıdenti, Djordj Vashıngton ýnıversıtetiniń (AQSh) neırohırýrgııa boıynsha professory Salım Abdýlraýf, N.N. Býrdenko atyndaǵy Ulttyq medıtsınalyq neırohırýrgııany zertteý ortalyǵynyń (Reseı) ǵylymı jetekshisi jáne qurmetti prezıdenti Aleksandr Konovalov, Great Ormond Street aýrýhanasynyń (Ulybrıtanııa) balalar neırohırýrgııasy men kranıofatsıaldy hırýrgııa bóliminiń jetekshisi, University College London oqý ornynyń balalar neırohırýrgııasy boıynsha professory Nýr ýl Oveıs Djılanı, Humanitas IRCCS zertteý aýrýhanasynyń (Italııa) «gamma-pyshaq» jáne stereotaksıkalyq neırohırýrgııa departamentiniń dırektory Pero Pıkotstsı, QR Densaýlyq saqtaý mınıstri Aqmaral Álnazarova, «Ulttyq neırohırýrgııa ortalyǵy» AQ basqarma tóraǵasy Serik Aqsholaqov sóz sóıledi.
Osyǵan deıin Memleket basshysynyń Mınsk qalasyna barǵany týraly jazdyq.
