Memleket basshysy álemdik naryqtaǵy jaǵdaıdyń ózgerýine baılanysty jıyn ótkizdi

ASTANA. KAZINFORM — Qasym-Jomart Toqaev Premer-mınıstr Oljas Bektenovtiń, Ulttyq bank tóraǵasy Tımýr Súleımenovtiń jáne basqa da laýazymdy tulǵalardyń qatysýymen jıyn ótkizdi. Bul týraly Aqorda málim etti.

Onda álemdik naryqtaǵy tarıftik qaqtyǵystardyń saldarynan energetıka resýrstary jáne negizgi taýarlar baǵasynyń quldyraýyna baılanysty el ekonomıkasynda qalyptasqan ahýal qaraldy.

— Memleket basshysy Úkimet pen jergilikti atqarýshy organdardyń is-qımyl josparyn qysqa merzimde aıaqtaýdy tapsyrdy. Bul jumys qarjy-ekonomıkalyq daǵdarys kezinde ósimdi jáne tartylatyn ınvestıtsııa kólemin tómendetpeýdi kózdeıdi. Qasym-Jomart Toqaev qazirgi asa qolaısyz jaǵdaıǵa qaramastan, elimizdiń ekonomıkalyq damýy boıynsha ózi jarııalaǵan basymdyqtar, sonyń ishinde iri ınfraqurylymdyq jobalar, tsıfrlandyrý men jasandy ıntellektini damytý, aýyl sharýashylyǵy men kólik-logıstıka salasyn jańǵyrtý bastamalary tolyq júzege asyrylatynyn aıtty, — delingen habarlamada.

Prezıdent kelesi aptada osy máselege oraı arnaıy keńes ótkizýdi josparlap otyr.

Eske sala keteıik, buǵan deıin munaı baǵasy quldyrap, dollardyń baǵamy «ushqanyna» baılanysty Ulttyq bank valıýta naryǵy týraly aqparat taratqanyn jazǵan bolatynbyz.