Memleket basshysy: Álemde tranzıt úshin báseke kúsheıip bara jatyr
ASTANA. KAZINFORM — Transkaspıı kólik baǵytyn damytýdyń mańyzy arta bastady. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Kólik-logıstıkany odan ári damytý kerek. Elimiz Eýropa men Azııanyń arasyn jalǵap turǵan asa mańyzdy kópir bolyp sanalatyny keńinen belgili. Byltyr bizdiń terrıtorııamyz arqyly júk tasymaldaý kólemi 1 mıllıard tonnadan asty. Sonymen birge elimizdiń tranzıttik áleýetin arttyrýǵa áli de zor múmkindik bar, — dedi Prezıdent.
Memleket basshysynyń aıtýynsha, «Soltústik — Ońtústik» kólik dálizi Parsy shyǵanaǵy men Ońtústik Azııa elderiniń naryǵyna tikeleı jol ashady. Al «Shyǵys — Batys» dálizi men Qytaıdyń «Bir beldeý, Bir jol» jahandyq bastamasy Qazaqstannyń Eýrazııadaǵy negizgi qurlyq joly retindegi rólin kúsheıte túsedi.
— Sondaı-aq biz úshin Transkaspıı kólik baǵytyn damytýdyń mańyzy arta bastady. Bul baǵyttardyń bári birtutas júıe sııaqty jumys istep, elimizge edáýir tabys ákelýi kerek. Sondaı-aq ınfraqurylymdy jaqsartýǵa jańa ınvestıtsııa tartýy qajet, sapaly jumys oryndaryn ashýǵa yqpal etýge tıis. Osy oraıda, tsıfrlyq tásilderdi aýqymdy túrde qoldanǵan abzal. Onsyz eshqandaı tıimdilik bolmaıdy, — dedi Qasym-Jomart Toqaev.
Prezıdent óńirlerdiń kólik baılanysyna qatysty máselemen myqtap aınalysý kerektigin basa aıtty.
— Іri tranzıttik aımaq sanalatyn Qazaqstan úshin bul baǵyt aıryqsha mańyzdy. Biz taıaýda Vetnamǵa Qytaıdyń Lıanıýngan porty arqyly bıdaıdyń alǵashqy legin jónelttik. Aýǵanstanda Pákistan naryǵyna shyǵýǵa múmkindik beretin «Týrgýndı — Gerat» temir jolyn salý josparda bar. Alaıda, jańa kólik baǵyttaryna jáne jańa naryqtarǵa jol ashatyn múmkindikter munymen shektelmeıdi. Alda atqarar sharýa kóp. Jalpy, álemde tranzıt úshin báseke kúsheıip bara jatyr. Basqa da arzan balama baǵyttar men joldar usynylýda. Tranzıttik tasymaldyń kólemin arttyramyz desek, biz aldyn ala áreket etip, árdaıym bir qadam alda bolýymyz kerek. Taǵy da qaıtalap aıtarym, ınfraqurylymdy jańǵyrtý isin odan ári jalǵastyryp, osy saladaǵy ozyq el bolý úshin tsıfrlandyrý men jasandy ıntellektini keń aýqymda paıdalanǵan jón, — dedi Qasym-Jomart Toqaev.
Prezıdent bıyl uzyndyǵy 836 shaqyrym bolatyn «Dostyq — Moıynty» temir jolynyń ekinshi jelisi iske qosylatynyn atap ótti.
— Jobany óz kúshimizben óte qysqa merzim ishinde júzege asyrdyq. Bul joldyń mán-mańyzy erekshe, sebebi «Shyǵys-Batys» baǵytynyń júk ótkizý múmkindigin aıtarlyqtaı arttyrady. Biraq munymen toqtap qalýǵa bolmaıdy. Úkimet «Baqty-Aıagóz», «Qyzyljar-Moıynty» jobalaryn ýaqytyly júzege asyrýǵa tıis. Sebebi, atalǵan jobalar elimizdegi temirjol júıesiniń tolyq qańqasyn qalyptastyrady, — dedi Memleket basshysy.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.