Memleket basshysy Alataý qalasynyń damý barysymen tanysty
QONAEV. KAZINFORM – Prezıdent Qasym-Jomart Toqaevtyń Almaty oblysyna jumys sapary Alataý qalasynyń damý josparymen tanysýdan bastaldy.
Qazirgi kezde qala aýdany 88 myń gektardy quraıdy. Shahar 2050 jylǵa deıin kezeń-kezeńimen damytylatyn 4 arnaýly aýmaqqa bólingen. Sonymen qatar qalanyń negizgi damý aımaqtary men tabys kózderi aıqyndalyp jatyr. Magıstraldy ınfraqurylymdy ilgeriletý boıynsha jol kartasy qolǵa alynǵan.
Basqarýdyń jańa modelin qalyptastyratyn Konstıtýtsııalyq zań qabyldandy.
Búginde Gate City turǵyn úı alaby jedel órkendep keledi. Munda «jaıly mektep» boı kóterip, «Mareven Fýd», «KNAÝF», Fruit Art, Dolce Pharm jáne Almaty jeldetkish zaýyty sekildi júıe quraıtyn kásiporyndar jumys isteıdi.
Budan bólek, 53 ınvestıtsııalyq jobadan turatyn pýl jasaqtaldy. Onyń jalpy somasy 2 trıllıon teńgeden asady.
Atap aıtqanda, PepsiCo kompanııasy Ortalyq Azııadaǵy kartop óńdeıtin eń iri zaýyt salyp jatyr. Mars Petcare kompanııasy úı janýarlaryna arnalǵan azyq óndiretin óńirdegi alǵashqy zamanaýı ári biregeı jobany qolǵa aldy. KHAN TENGRI BIOPHARMA kompanııasy dári-dármek pen medıtsınalyq qondyrǵylar shyǵarýmen aınalysady. «Istkomtrans» jáne G-Trans kompanııalary logıstıkalyq klaster qurýda.
Memleket basshysyna Iconic Complex jobasy tanystyryldy. Bul Alataýdaǵy kópfýnktsıonaldy ozyq keshen sanalady. Qaladaǵy negizgi nysannyń biri Gate District aýdanynda boı kótermek.
Aıta keteıik, buǵan deıin Prezıdent jumys saparymen Almaty oblysyna barǵany habarlandy.
