Memleket basshysy AQSh Prezıdenti Donald Trampqa quttyqtaý jedelhatyn joldady
ASTANA. KAZINFORM – Qasym-Jomart Toqaev Amerıka Qurama Shtattarynyń Prezıdentin týǵan kúnimen quttyqtady. Bul týraly Aqordanyń baspasóz qyzmeti habarlady.
Memleket basshysy jedelhatta elimiz Qurama Shtattarmen keńeıtilgen strategııalyq seriktestikti odan ári nyǵaıtýǵa beıil ekenin atap ótti. Sonymen qatar joǵary deńgeıdegi saıası dıalogqa jáne eki el arasyndaǵy saýda-ekonomıkalyq, ınvestıtsııalyq yntymaqtastyqtyń damý qarqynyna toqtaldy.
Prezıdent Qazaqstannyń beıbitshilikti saqtaý, ózara túsinistik pen ornyqty damý bastamalaryn ilgeriletý baǵytyndaǵy birlesken jumysty jalǵastyrýǵa ázirligin rastady.
Qasym-Jomart Toqaev Donald Trampqa baq-bereke jáne AQSh halqynyń ıgiligi jolyndaǵy jaýapty memlekettik qyzmetine tabys tiledi.
Aıta ketelik Memleket basshysy ІІІ Charlzdiń týǵan kúnine baılanysty quttyqtaý hatyn joldaǵan edi.
