Memleket basshysy Aqmola oblysynyń ákimi Marat Ahmetjanovqa birqatar tapsyrma berdi

Memleket basshysy Aqmola oblysynyń ákimi Marat Ahmetjanovty qabyldady, dep habarlaıdy Kazinform Aqordanyń baspasóz qyzmetine silteme jasap. 

Marat Ahmetjanov Aqmola oblysynyń áleýmettik-ekonomıkalyq damýy jaıynda baıandady, óńir ekonomıkasynyń birqatar salasynda oń nátıjeler bar ekeni týraly málimet berdi. Aıtýynsha, negizgi kapıtalǵa salynǵan ınvestıtsııa kólemi 530 mıllıard teńgege jetken. Onyń ishinde jeke ınvestıtsııa 435 mıllıard teńgeden asqan. 154 joba iske asyrylyp, 1,5 myń jumys orny ashylǵan.

Aqmola oblysynyń ákimi sharýalardy qoldaý jáne qaıta óńdelgen ónim úlesin arttyrý sharalary turaqty túrde qabyldanyp jatqanyn aıtty. Jyl basynan beri ósimdik maıy, óńdelgen et, sút, maı, irimshik jáne súzbe sııaqty azyq-túlik túrlerin óndirý kórsetkishi ósken. Makınsk qus fabrıkasynyń 3-kezeńi iske qosylǵanyn jáne «Aq-Dala Agro» jaýapkershiligi shekteýli seriktestiginiń óndiristik qýaty kezeń-kezeńimen artyp keletinin habarlady. Bul oblystyń qus etin óndirý boıynsha elimizde kóshbasshy óńirlerdiń birine aınalýyna múmkindik bergen.

Sonymen qatar jylytý maýsymynyń barysy týraly baıandady. Barlyq kommýnaldyq qyzmettiń jumysy qatań baqylaýǵa alynǵan. Kókshetaý jáne Stepnogorsk qalalaryndaǵy nysandar kezeń-kezeńimen jańǵyrtylǵan. Kókshetaý qalasyn damytýǵa qatysty bas jospardyń jobasy ázirlengeni týraly aqparat berdi.

Bul joba qalanyń ekologııalyq jáne ınfraqurylymdyq máselelerin sheshýdi kózdeıdi. Halyqtyń turmysyn jaqsartýǵa jáne irgeles mıgratsııany tómendetýge yqpal etetin Aglomeratsııany damytý jónindegi jańa keshendi jospardyń jobasyn tanystyrdy.

Qasym-Jomart Toqaev óńirdi odan ári damytý, aýyl sharýashylyǵy ónimderin tereń óńdeý jobalaryn iske asyrý, ınvestıtsııa tartý, sondaı-aq Aqmola oblysynyń qalalaryn jylýmen úzdiksiz qamtamasyz etý jóninde birqatar tapsyrma berdi.