Toqaev agroónerkásip keshenindegi aqparattyq júıelerdi ıntegratsııalaýdy tapsyrdy

ASTANA. KAZINFORM — Bul týraly Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda aıtty.  

— «Jekelegen „aqyldy“ sheshimderden tolyq tsıfrlandyrylǵan agroóndiriske kóshý kerek. Árbir sharýashylyq tsıfrlyq tehnologııalardy paıdalanýǵa nıetti bolǵany jón.

Memlekettik qoldaý óndiriske ınnovatsııany, sonyń ishinde jasandy ıntellekt tehnologııalaryn engizip jatqan kásiporyndarǵa berilýi qajet.

Agroónerkásip keshenindegi aqparattyq júıelerdi ońtaılandyrýdy jalǵastyrǵan durys. Qazir olardyń arasynda baılanys múlde joq deýge bolady. Kóp jaǵdaıda sheshimder qate statıstıka negizinde qabyldanady. Ulttyq aýyl sharýashylyǵy sanaǵynyń nátıjesi saladaǵy naqty jaǵdaıdy kórsetýge tıis. Jınaqtalǵan málimetter agrosektordaǵy tsıfrlyq júıelerdi odan ári damytý men jańǵyrtýǵa negiz bolady, — dedi Prezıdent.

Prezıdent Úkimet Strategııalyq josparlaý jáne reformalar agenttigimen birlesip málimetter sapasyn baqylaýǵa alýy kerek ekenin aıtty.

— Úkimet Strategııalyq josparlaý jáne reformalar agenttigimen birlesip, salalyq aqparattyq júıelerdi ıntegratsııalaýdy, sondaı-aq málimetter sapasyn turaqty túrde baqylaýǵa alýy kerek.

Elektrondy agroónerkásip kesheni platformasynyń bazasynda salany keshendi basqarýǵa yqpal etetin aýyl sharýashylyǵy málimetteriniń biryńǵaı arhıtektýrasyn qalyptastyrǵan durys, — dedi ol.

Aıta ketelik Memleket basshysy vedomstvolar túrli josparlar men jol kartalaryn ázirleýmen áýestenip ketkenin synǵa alǵan edi.