Memleket basshysy: AES qurylysynda barlyq ekologııalyq normany saqtaý – basty talap

ASTANA.  KAZINFORM - Qasym-Jomart Toqaev atom energetıkasy baǵytyndaǵy jumys bir vedomstvonyń nemese salanyń aıasynda shektelip qalmaýǵa tıis ekenin eskertti.

– ıAdrolyq energetıkanyń negizin qalaý – aýqymdy jalpyulttyq mindet. Atom generatsııasy eń taza qýat kózderiniń biri sanalatynyna qaramastan, AES qurylysynda barlyq ekologııalyq normany saqtaý – basty talap. Ǵylymı jáne qoǵamdyq uıymdarmen konstrýktıvti yqpaldastyqty jolǵa qoıý mańyzdy. Azamattarymyzdyń belgili bir bóliginde radıofobııa bar. Odan arylý úshin keshendi túsindirý jumystaryn júrgizý qajet. Atom jobalaryn júzege asyrý barysynda jergilikti bıznestiń múddesin eskerip, otandyq úlestiń deńgeıin barynsha qamtamasyz etý kerek. Kásiporyndarymyzda atalǵan salanyń joǵary standarttaryna saı ónim shyǵarý úshin ǵalymdardyń, ınjenerler men ónerkásip mamandarynyń kúsh-jigerin jumyldyrǵan jón. ıAdrolyq energetıka keń beıindi kásiptik tehnıkalyq mamandar daıarlaýǵa tyń serpin beredi. Biz tehnıkalyq bilim berý salasy damyǵan tsıfrlyq derjavaǵa aınalýymyz kerek. Bul – ulttyq bolmysymyzǵa qatysty óte mańyzdy másele. Osy baǵyttaǵy jumys úzdiksiz jalǵasa beredi. Ahmet Baıtursynov «Ǵylym men óner artqan saıyn beınet kemı túsedi» degen. Ǵylymı jetistikterdi barlyq salada jappaı paıdalaný qajet. Ǵylymsyz eshteńe de berekeli bolmaıdy. Bul anyq nárse. Al bilim bolmasa, qarańǵylyq pen nadandyq beleń alady. Sondyqtan qoǵamda ǵylym-bilim kýltin ornyqtyrý qajet. Laıyqty ǵalymdardy, ásirese, jas mamandardy qosymsha qarjylandyrý kerek, – dedi Memleket basshysy.

Aıta keteıik, Prezıdent Abaı oblysynda AES salý perspektıvasyn eskerý kerek ekenin málimdedi.