Memleket basshysy Abý Dabıdiń Taq murageri Haled ben Muhammed Ál Nahaıanmen kelissóz júrgizdi

ASTANA. KAZINFORM - «Aqorda» rezıdentsııasynda Qazaqstanǵa resmı saparmen kelgen Abý Dabıdiń Taq murageri sheıh Haled ben Muhammed ben Zaıd Ál Nahaıandy saltanatty qarsy alý rásimi ótti, dep habarlaıdy Aqordanyń baspasóz qyzmeti.

Qasym-Jomart Toqaev mártebeli meımanǵa iltıpat bildirip, onyń bul sapary Qazaqstan men Birikken Arab Ámirlikteri arasyndaǵy yntymaqtastyqqa tyń serpin beretinine nazar aýdardy.

Prezıdenttiń aıtýynsha, Ámirlikter elimizdiń eń basty seriktesteriniń biri. Qos memlekettiń maqsat-múddeleri bir-birimen sáıkes keledi. 2023 jyly eki el úkimetteri Strategııalyq ınvestıtsııalyq jobalardy júzege asyrý týraly birlesken deklaratsııaǵa qol qoıdy.

Kezdesýde Birikken Arab Ámirlikteriniń Qazaqstan ekonomıkasyndaǵy eń iri sheteldik ınvestorlardyń ondyǵyna kiretini jóninde aıtyldy. Byltyr BAÁ-nyń elimizge quıǵan ınvestıtsııa kólemi eki esege artyp, rekordtyq kórsetkishke jetti.

Memleket basshysy atalǵan sapar aıasynda quny 5 mıllıard dollardy quraıtyn 20-dan astam kommertsııalyq kelisimge qol qoıylatynyn quptady. Olardy júzege asyrý qos el arasyndaǵy strategııalyq yntymaqtastyqty aıtarlyqtaı ilgeriletip, ózara tıimdi baılanystardy nyǵaıtýǵa septigin tıgizedi.

Abý Dabıdiń Taq murageri kórsetilgen qonaqjaılyq úshin rızashylyǵyn bildirdi. Sonymen qatar tabıǵaty kórkem, halqy jaısań elimizge erekshe qýanyshpen keletinin jetkizdi.

Haled ben Muhammed Ál Nahaıan Qazaqstan men BAÁ arasyndaǵy qarym-qatynas ózara senim, qoldaý jáne ortaq ıgilikke birge umtylý qaǵıdattaryna qurylǵanyn atap ótti. Bul baılanystar saýda-ınvestıtsııalyq yqpaldastyq sheńberinen shyǵyp, energetıka, kólik salalarynan bastap tsıfrlyq ınfraqurylym men bilim berý isine deıin jalǵasyp jatqan keń aýqymdy baǵyttardy qamtıtynyna toqtaldy.

Taq murageriniń aıtýynsha, búgin qol qoıylǵan kelisimder eki eldiń bolashaqta da birlesip jumys isteýge beıil ekenin dáleldeıdi.

Qasym-Jomart Toqaev búgin Aqordada Abý-Dabıdiń Taq muragerin qarsy aldy.