Toqaev Abý Dabıdiń Taq muragerimen ınvestıtsııalyq jobalardy talqylady
ASTANA. KAZINFORM - Prezıdent Qasym-Jomart Toqaev XVIII BRIKS sammıti aıasynda Abý Dabıdiń Taq murageri sheıh Haled ben Muhammed ben Zaıd Ál Nahaıanmen kezdesti, dep habarlaıdy Aqordanyń baspasóz qyzmeti.
Memleket basshysy sheıh Haled ben Muhammed ben Zaıd Ál Nahaıannyń Astanaǵa jasaǵan saparynyń tarıhı mańyzyn atap ótti. Onyń aıasynda ekijaqty qarym-qatynasty damytýǵa tyń serpin bergen mańyzdy qujattarǵa qol qoıylǵan edi.
– Ózara yntymaqtastyǵymyz shyn máninde san qyrly sıpatqa ıe jáne kóptegen baǵytty qamtıdy. Aldaǵy ýaqytta da birlesken jumysty ilgeriletý úshin kúsh jumyldyra beremiz, – dedi Qasym-Jomart Toqaev.
Prezıdent pen Abý Dabıdiń Taq murageri energetıka, kólik-logıstıka, aqparattyq tehnologııa jáne aýyl sharýashylyǵy salalarynda tabysty iske asyrylyp jatqan iri ınvestıtsııalyq jobalardy talqylady. Atalǵan bastamalar ekonomıkalyq yqpaldastyqty jandandyryp, ózara saýda-sattyq kólemin arttyrýǵa septigin tıgizedi. Kezdesý qorytyndysy boıynsha taraptar eki el arasyndaǵy tyǵyz yntymaqtastyqty nyǵaıtýǵa múddeli ekenin rastady.
Qasym-Jomart Toqaev BAÁ Prezıdenti, sheıh Muhammed ben Zaıd Ál Nahaıanǵa jyly lebizin joldap, onyń Qazaqstanǵa saparmen kelýin kútetinin aıtty.
Aıta keteıik, Memleket basshysy búgin BRIKS XVIII sammıtine qatysý úshin Nıý-Delı qalasyna bardy.
