Memleket basshysy Ábilqaıyr Sqaqovty qabyldady

Prezıdent «Áleýmettik medıtsınalyq saqtandyrý qory» KeAQ basqarma tóraǵasy Ábilqaıyr Sqaqovty qabyldady. Bul týraly Kazinform Aqordaǵa silteme jasap habarlaıdy. 

Ábilqaıyr Sqaqov:

– áleýmettik medıtsınalyq saqtandyrý júıesiniń jyl basynan beri jáne jalpy MÁMS qolǵa alynǵan ýaqyt ishinde atqarylǵan jumystardyń qorytyndysy týraly esep berdi;

– áleýmettik medıtsınalyq saqtandyrý júıesin engizý nátıjesinde densaýlyq saqtaý salasyna bólinetin qarjy 2,5 ese, al bir turǵynnyń densaýlyǵyna jumsalatyn shyǵyn eki ese óskeni jóninde baıandady;

– azamattarǵa arnalǵan medıtsınalyq kómektiń qoljetimdiligin jaqsartý jaıynda aıtty;

– MÁMS júıesiniń tıimdiligin arttyrýǵa qatysty Prezıdent tapsyrmalarynyń oryndalý barysy týraly aqparat berdi.

Atap aıtqanda, áleýmettik medıtsınalyq saqtandyrý júıesiniń aýqymyn keńeıtýge, Qordyń qarjylyq turǵydan turaqtylyǵyn qamtamasyz etýge jáne MÁMS-ke qatysty barlyq protsesti jedel tsıfrlandyrýǵa baǵyttalǵan keshendi sharalar júzege asyrylyp jatyr.

Budan bólek, medıtsınalyq saqtandyrý júıesiniń qyzmetine qatysty qazaqstandyqtardy mazalaǵan ózekti máselelerge nazar aýdaryldy. Qor josparyn iske asyrý barysynda, eń aldymen, naýqasqa jáne onyń medıtsınalyq kómekke qajettiligin óteýge basa mán beriledi. 

Memleket basshysy Ábilqaıyr Sqaqovqa áleýmettik medıtsınalyq saqtandyrý júıesiniń tıimdiligin arttyrýǵa baǵyttalǵan birqatar mindet júktedi.