Memleket basshysy: 20 mıllıon sharshy metrden astam turǵyn úı salyndy
ASTANA. KAZINFORM — Memleket basshysy Qasym-Jomart Toqaev Parlament palatalarynyń birlesken otyrysynda qurylys, aýyz sýmen qamtý, agroónerkásip jáne farmatsevtıka salalarynda atqarylyp jatqan jumystar jóninde málimdeme jasady.
— Elimizde túbegeıli jańa Qurylys jáne Sý kodeksteri qabyldandy. Strategııalyq mańyzy aıryqsha salalardy retke keltirý úshin qabyldanǵan qujattardyń mańyzy zor.
Byltyr Qazaqstanda 20 mıllıon sharshy metrden astam turǵyn úı salyndy. Bul da — tarıhymyzdaǵy eń joǵary kórsetkish. Eń basty nátıje — myńdaǵan otbasy baspanaly boldy, — dedi Prezıdent.
Onyń málimdeýinshe, qalalardy abattandyrýmen qatar, aýyldardyń jaǵdaıyn jaqsartýǵa basymdyq berilip keledi. Bıyl shalǵaı eldi mekenderde turatyn jarty mıllıonnan astam adamdy aýyz sýmen qamtamasyz etýge múmkindik beretin 12 iri joba iske qosylady.
Sonymen birge, memleket aýyl sharýashylyǵy taýarlaryn óndirýshilerge buryn-sońdy bolmaǵan aýqymda qoldaý kórsetip jatyr. Ótken jyly agroónerkásip salasyna jeńildetilgen nesıe berý úshin 1 trıllıon teńge qarjy tartyldy.
— Osylaısha, sharýalar alǵash ret jylyna 5 paıyzdyq mólshermen «uzaqmerzimdi» qarajat alý múmkindigine ıe boldy. Mundaı qadam aýyl sharýashylyǵy salasyn jańǵyrtýǵa yqpal etkeni sózsiz.
Osyndaı sharalardyń arqasynda agroónerkásip keshenine tıesili jalpy ónim quny shamamen 10 trıllıon teńgege jetti. Al eksport kólemi 1,3 ese artyp, 7 mıllıard dollar tabys tústi. Bul — sońǵy on jyldaǵy eń joǵary kórsetkish.
Ozyq tehnologııalar salasy da qarqyndy damyp keledi. Ásirese, otandyq farmatsevtıka baǵytynda biraz jetistikterimiz bar.
Farmatsevtıka ındýstrııasyna senim deńgeıi boıynsha Qazaqstan Táýelsiz memleketter dostastyǵy elderi arasynda kósh bastap tur. Mundaı baǵany Dúnıejúzilik densaýlyq saqtaý uıymy berip otyr.
Otandyq dári-dármek naryǵynyń kólemi 1 trıllıon teńgeden asty. Keıingi úsh jylda bul salaǵa tartylǵan sheteldik ınvestıtsııa kólemi úsh eseden astam ulǵaıdy.
Alaıda, buǵan máz bolyp otyra berýge bolmaıdy, aldymyzda turǵan mindet az emes, qoıylǵan maqsattarǵa mindetti túrde jetýimiz kerek, — dedi Qasym-Jomart Toqaev.
Aıta keteıik, buǵan deıin Toqaev Quryltaıdyń aldynda qandaı mindet turǵanyn ataǵanyn jazǵanbyz.
