Memleket basshylary qol jetkizgen kelisimderdi dáıekti túrde júzege asyramyz – Qytaı elshisi
ASTANA. KAZINFORM – Qazaqstan men Qytaı tústi metallýrgııany turaqty damytý jáne «jasyl» paıdaly qazbalar salasyndaǵy yntymaqtastyqty keńeıtýdi jalǵastyrady. Bul týraly Qytaı Halyq Respýblıkasynyń Qazaqstandaǵy Tótenshe jáne Ókiletti Elshisi Han Chýnlın Qazaqstan-Qytaı tústi metallýrgııany ornyqty damytý forýmynda aıtty.
Elshiniń aıtýynsha, Qytaı búginde metallýrgııa ónimderin óndirý men tutyný, ǵylymı-zertteý jáne tájirıbelik-konstrýktorlyq jumystar, jabdyq shyǵarý jáne óndiristik qýattar boıynsha álemde kósh bastap tur. Al Qazaqstan energetıkalyq jáne mıneraldyq resýrstarǵa baı memleket retinde ekijaqty yntymaqtastyqty damytýda mańyzdy oryn alady.
– Qazaqstan – «Bir beldeý, bir jol» bastamasyn alǵash ret jarııalaǵan el. Hrom, volfram, mys, qorǵasyn jáne myrysh qorlary boıynsha álemdegi jetekshi memleketterdiń biri. Sondyqtan eki eldiń áleýeti ózara tolyqtyrylyp, taý-ken jáne metallýrgııa salasyndaǵy áriptestik tabysty damyp keledi, – dedi Han Chýnlın.
Ol Qytaı tarapynyń qatysýymen salynǵan Qazaqstandaǵy alǵashqy zamanaýı alıýmınıı zaýytynyń 18 jyldan beri turaqty jumys istep kele jatqanyn atap ótti. Sondaı-aq bul kásiporynnyń London metall bırjasynyń joǵary tazalyqtaǵy alıýmınııge arnalǵan sertıfıkatyn alǵan Qazaqstandaǵy jalǵyz óndirýshi ekenin aıtty.
Qytaı elshisi QHR Tóraǵasy Sı Tszınpın men Qazaqstan Prezıdenti Qasym-Jomart Toqaevtyń taý-ken ónerkásibindegi yntymaqtastyqqa erekshe mán beretinin jetkizdi.
Onyń aıtýynsha, jýyrda Shanhaıda ótken eki el basshylarynyń kezdesýinde energetıka jáne paıdaly qazbalardy ıgerý salalaryndaǵy ózara is-qımyldy keńeıtip, basym jobalardy jedel iske asyrý jóninde kelisimge qol jetkizildi.
Sonymen qatar, Qytaı men Qazaqstannyń salalyq vedomstvolary «Qytaı - Ortalyq Azııa» tetigi aıasynda «jasyl» paıdaly qazbalar jónindegi yntymaqtastyq týraly memorandýmdarǵa qol qoıǵan. Bıyl «Qytaı - Ortalyq Azııa» «jasyl» paıdaly qazbalar alıansyn qurý josparlanyp otyr.
Elshiniń sózinshe, kelesi jyly ótetin Qytaı–Ortalyq Azııa «jasyl» paıdaly qazbalar salasyndaǵy yntymaqtastyq konferentsııasy óńirdegi taý-ken kásiporyndarynyń ózara baılanysyn nyǵaıtatyn mańyzdy alańǵa aınalady.
Han Chýnlın halyqaralyq yntymaqtastyq tek jańa energetıka men jańa materıaldarǵa qajetti mıneraldyq resýrstardy ıgerýmen shektelmeıtinin, sonymen qatar dástúrli ken oryndaryn ekologııalyq talaptarǵa saı ári jaýapkershilikpen ıgerýdi de qamtıtynyn aıtty.
Onyń aıtýynsha, aldaǵy kezeńde taraptar memleket basshylary qol jetkizgen kelisimderdi iske asyrýdy jalǵastyryp, saıasatty úılestirýdi kúsheıtedi, Qytaıdyń «jasyl» zııatkerlik tehnologııalary men zamanaýı jabdyqtaryn engizedi jáne mıneraldyq resýrstardy barlaý, óndirý, saqtaý, jetkizý jáne ótkizý baǵyttarynyń barlyǵy boıynsha yntymaqtastyqty tereńdetedi.
Aıta keteıik, metallýrgııa ónerkásibi – el ekonomıkasy júıesin quraýshy negizgi salalardyń biri. Ol qara jáne tústi metallýrgııany, ferroqorytpa, asyl, sırek jáne jerde sırek kezdesetin metaldar óndirýdi, sondaı-aq olardy tereń óńdeı otyryp, ónim shyǵarýdy qamtıdy.
