Memleket basshylary beıresmı kezdesý ótkizdi
ASTANA. KAZINFORM — Qasym-Jomart Toqaev mártebeli meımannyń Almatyǵa saparmen kelgenine rızashylyq bildirip, mundaı beıresmı kezdesýler jaqsy dástúrge aınalǵanyn aıtty. Bul týraly Aqorda málim etti.
– Bul – baýyrlas, dostas memleketter arasyndaǵy yntymaqtastyqty damytý maqsatynda atqarylyp jatqan jumysty iskerlik sıpatta taǵy bir talqylaýǵa oraıly sát. Biz – odaqtas eldermiz. Eki el arasyndaǵy yqpaldastyq tutas Ortalyq Azııa óńirindegi jaǵdaıǵa tikeleı áser etedi, – dedi Qazaqstan Prezıdenti.
Memleket basshysy baýyrlas halyqtardy jaqyndastyrýǵa, aımaqtyń ornyqty jáne qaýipsiz damýyndaǵy ortaq maqsattardy ilgeriletýge Shavkat Mırzıeevtiń zor úles qosqanyn atap ótti.
Ózbekstan Prezıdenti ekijaqty baılanystardy nyǵaıtýdy kózdeıtin búgingi kezdesýdiń mańyzyna toqtaldy.
– Meni ózińizdiń týǵan jerińiz, atap aıtqanda, Almaty qalasynda dostyq peıilmen, eki halyqtyń dástúrine saı iltıpatpen qarsy alyp jatqanyńyzǵa raqmet. Ózimniń jáne halqymnyń atynan rızashylyǵymdy bildiremin. Sońǵy jyldary qarym-qatynasymyz múldem jańa deńgeıge kóterildi. Biz – odaqtaspyz. Ózara syılastyǵymyzdyń arqasynda kóptegen másele sheshimin taýyp keledi, ekeýara ýaǵdalastyqtardyń barlyǵy iske asyrylyp jatyr. Naqty nátıjeler bar. Sizdi Qazaqstannyń zor tabystarǵa jetýimen quttyqtaımyn. Ekonomıkalaryńyz damyp keledi, jetistikterińiz joǵary. Birinshi toqsandy 5,4 paıyzben qorytyndylap otyrsyzdar. Búgingi kezdesýimizdiń sıpaty resmı bolmasa da, men úlken qurammen keldim. Degenmen árbir osyndaı beıresmı júzdesýler bizdiń baılanystarymyzǵa, barlyq kelisimderimizdiń oryndalýyna tyń serpin beredi, – dedi Shavkat Mırzıeev.
Taraptar saıası, saýda-ekonomıkalyq, kólik-logıstıkalyq, ınvestıtsııalyq, energetıkalyq, sý sharýashylyǵy, ónerkásip kooperatsııasy jáne týrızm salalaryndaǵy ózara yqpaldastyqtyń perspektıvasyn jan-jaqty talqylady. Mádenı-gýmanıtarlyq baılanystardy damytýǵa erekshe nazar aýdaryldy. Sonymen qatar óńirlik jáne halyqaralyq kún tártibiniń ózekti máseleleri qarastyryldy. Kezdesý sońynda prezıdentter qazaq-ózbek strategııalyq seriktestigin odan ári tereńdetýge beıil ekenin rastady.
Buǵan deıin habarlanǵandaı, Ózbekstan Prezıdenti Shavkat Mırzıeev Qazaqstanǵa jumys saparymen keldi.
Prezıdent pen Shavkat Mırzıeev Almaty taý shańǵysy klasterimen tanysty.
Qazaqstan men Ózbekstan prezıdentteri «Medeý» sport keshenine bardy.